Бугун, 5 август куни Россиянинг Сочи шаҳрида Туркия президенти Режеп Таййип Эрдоған ва Владимир Путин Сурияда ўтказилиши кутилаётган махсус операция, Украинадаги вазият ва яна бир нечта масалалар бўйича музока ўтказишди.

Учрашув аввалида Россия президенти “Турк оқими”ни Европани Россия гази билан таъминловчи энг муҳим артериялардан бири деб атади, бунинг учун минтақадаги ҳамкорлар Анқарага миннатдор бўлишлари кераклигини айтди.

“Яқинда қурилиши якунлаган “Турк оқими” бугун Европани Россия гази билан таъминловчи энг муҳим артериялардан бири ҳисобланади.

“Турк оқими” Европага углеводород етказиб беришнинг бошқа барча йўналишларидан фарқли ўлароқ, тўғри, ритмик, ҳеч қандай носозликларсиз ишламоқда.

Мен нафақат Туркиядаги истеъмолчиларга, балки Европадаги истеъмолчиларга ҳам етказиб беришни назарда тутяпман.

Шундай экан, менимча, европалик ҳамкорлар бизнинг газимизнинг Европа бозорига узлуксиз транзитини таъминлагани учун Туркиядан миннатдор бўлишлари керак.

Бундан ташқари, Путин Эрдоғанга Украинадан дон етказиб бериш масаласини ҳал қилгани учун миннатдорчилик билдирди. Шунингдек, Россия раҳбари Суриядаги вазиятни муҳокама қилишни таклиф қилди.

“Сизнинг бевосита иштирокингиз ва БМТ Котибияти воситачилигида Қора денгиз портларидан Украина донини етказиб бериш билан боғлиқ масала ҳал қилинди.

Етказиб бериш аллақачон бошланган ва мен бунинг учун ҳам, бир вақтнинг ўзида Россия озиқ-овқат ва рус ўғитларини жаҳон бозорларига узлуксиз етказиб бериш бўйича қарор қабул қилингани учун сизга раҳмат айтмоқчиман.

Сизлар билан савдо-иқтисодий алоқаларимизни ривожлантириш бўйича тегишли меморандум имзолай оламиз, деб умид қиламан”, — деди Путин.

Суҳбат давомида Владимир Путин Суриядаги вазиятга тўхталиб, давлатлар минтақадаги хавфсизликни таъминлашда катта ҳисса қўшаётганини эътироф этди.

“Биз узоқ вақтдан бери бошимиздан кечираётган муаммолар ҳақида ҳам гаплашамиз, мен минтақадаги хавфсизлик масалаларини, биринчи навбатда Сурия инқирозини назарда тутяпман.

Бу ерда Туркия ва Россия вазиятни нормаллаштиришга жуда катта ҳисса қўшди ва биз, албатта, бу мавзуни ҳам эътиборсиз қолдирмаймиз”, — деб ўз сўзини давом эттирди.

Эрдоған Путинга миннатдорчилик билдириб, икки давлат ўртасида тузиладиган меморандум шартномаси томонлар учун манфаатли бўлишини таъкидлади.

“Теҳрондаги учрашувимиздан сўнг тез орада яна учрашаётганимиздан хурсандман. Делегацияларимиз учрашди, бу учрашувлар самарали бўлди. Бу иқтисодиёт, савдо, барча соҳаларимизга тегишли. 

Бу соҳаларнинг барчасида кўплаб масалалар муҳокама қилинди, эҳтимол бунга чек қўямиз, дейишимиз мумкин. Туркия-Россия муносабатларида янги саҳифа очишимизга ишонаман.

Бу энергияга ҳам тааллуқлидир ва айниқса, биз қадамлар қўйган Қора денгиз бўйлаб “дон йўлаги”га тегишли.  Икки мамлакат туризм, транспорт бўйича ҳамкорликнинг янги босқичига чиқди”, — деди Туркия президенти.

Туркия раҳбари ҳамкасбига терроризмга қарши курашишда ёрдам беришни сўради. 

“Бугун биз кун тартибидаги барча масалаларни юзма-юз, кўзма-юз муҳокама қиламиз. Туркия нуқтаи назаридан, Россия терроризмга қарши курашиш бўйича жаҳон саҳнасида муҳим роль ўйнашини алоҳида айтмоқчиман.

Мен бу борада янада кўпроқ эътибор қаратишимиз керак, деб ҳисоблайман ва бу терроризмга қарши курашда минтақадаги вазиятни осонлаштиришига ишонаман. 

Бугун дунё Сочига кўз тикди: улар Сочида нима қиладилар, нимани муҳокама қиладилар? Эҳтимол, дунё бизнинг Сочидаги учрашувимизни диққат билан кузатиб бормоқда”, — деди Эрдоған.