title

Маълумотларга кўра, “GRU Space” дастлаб 2029 йилдан бошлаб Ой юзасида муайян ҳудудни ўрганиш ва келажакда меҳмонхона жойлаштириш учун тайёрлаш ишларини олиб боради.

Биринчи босқичда меҳмонхона шишириладиган конструкция шаклида бўлиши режалаштирилган бўлиб, у ерда тайёрланади ва кейин ойга олиб чиқилади. Ушбу иншоотда тўрт нафар одамни бир неча кун давомида жойлаштириш учун зарур шароитлар яратилади.

Компания баёнотида таъкидланишича, биринчи меҳмонхона Ой юзасида камида 10 йил давомида таъмирсиз фаолият юритиши мумкин бўлган тарзда лойиҳалаштирилади.

“GRU Space” кейинги босқичда роботлаштирилган технологиялар ёрдамида шишириладиган элементлар атрофида янада мустаҳкам ташқи конструкция барпо этишни режалаштирмоқда. Бу жараёнда маҳаллий ресурслардан, жумладан, Ой тупроғидан фойдаланиш кўзда тутилган.

Иккинчи босқичда, меҳмонхона бинолари Сан-Францискодаги Ноёб санъат саройи (Palace of Fine Arts) архитектураси услубидан илҳомланади ва унда 10 нафаргача меҳмонни қабул қилиш имкони яратилади.

Биринчи босқичдаги меҳмонхонада бир кечалик яшаш қиймати 416 минг доллардан ортиқ бўлади.

Иккинчи босқичда эса меҳмонлар бир кеча учун 83 минг доллардан ортиқ маблағ тўлашлари кутилмоқда.

Бундан ташқари, GRU Space Ойда “биринчи америкалик база”ни ташкил этиш режаларини ҳам очиқлади. Ушбу база омборлар, йўллар ва бошқа жисмоний инфратузилмани ўз ичига олади.

Компания, шунингдек, Марсда ҳам инфратузилма яратиш ниятида эканини маълум қилган, бироқ Қизил сайёрага илк ракета учиришлар 2030-йиллардан олдин амалга оширилиши эҳтимоли паст.

Қайд этилишича, “GRU Space” Ойдаги меҳмонхона учун хоналарни олдиндан брон қилиш имкониятини ҳам тақдим этмоқда.