Жанубий Корея собиқ президенти ўлим жазосига ҳукм қилиниши мумкин

Жанубий Корея собиқ президенти Юн Сеок Ёл оммавий тартибсизликлар уюштириш ва мамлакатда ноқонуний ҳарбий ҳолат эълон қилгани учун ўлим жазосига ёки умрбод қамоққа ҳукм қилиниши мумкин.

Сешанба куни Сеул суди Юн Сеок Ёлга қарши қўзғатилган жиноят иши доирасида томонларнинг якуний сўзларини тинглади. 

Судда махсус прокурорлар унинг ниятлари зўравонлик характеридан кам бўлмаганини таъкидлаб, агарда Юн Сеок Ёл бўйнига қўйилган айбловлар исботини топса, суддан унга нисбатан ўлим жазосини тайинлашни сўрашган.

Собиқ президент эса барча айбловларни рад этмоқда. Унинг айтишича, ҳарбий ҳолат жорий этиш рамзий характерга эга бўлган ва мухолифат томонидан содир этилаётган суиистеъмолларга жамоатчилик эътиборини жалб қилиш мақсадини кўзланган.

Исёнга раҳбарлик қилиш — Юнга қўйилган энг оғир айблов бўлиб, у ўлим жазоси ёки умрбод қамоқ жазосини назарда тутади.

Воқеа тафсилотига келадиган бўлсак, 2024 йил декабрь ойи бошида бор-йўғи бир неча кун ичида Жанубий Кореядаги сиёсий вазият кескин ўзгарди.

Дастлаб, Юн Сеок Ёл ҳарбий ҳолат жорий этган, кейин парламент бу қарорни блоклаган. Шундан сўнг парламентда кўпчиликни ташкил этган мухолифат депутатлари президентга нисбатан импичмент эълон қилиш тўғрисидаги қонун лойиҳасини киритган. Кейинчалик Юн ҳибсга олиниб, суд олдига олиб келинган.

Маълумот учун, Жанубий Кореяда сўнгги қарийб 30 йил давомида ўлим жазолари ижро этилмаган. 1996 йилда собиқ ҳарбий диктатор Чон Ду Хван 1979 йилда ҳарбий тўнтариш орқали ҳокимиятни қўлга киритгани учун ўлим жазосига ҳукм қилинган, аммо кейинчалик унинг жазоси умрбод қамоққа алмаштирилган.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг