Шри-Ланкада ёнилғи қуйиш шохобчалари олдида километрлик навбатлар юзага келди —Видео
Шри-Ланканинг энг йирик шаҳри Коломбо бўйлаб автомобиллар учун ёқилғи навбатлар ҳамон кузатилмоқда. Бу ҳақда РИА Новости хабар бермоқда.
Бугун, 17 июль куни шаҳар бўйлаб ёнилғи қуйиш учун навбатлар 1-2 километрга чўзилган.
“Бу ёнилғи, бензин учун навбат. Тахминан уч кундан бери кутяпман. Мендан бошқа кўп одамлар навбат кутишмоқда, бизга рақам беришмаяпти. Шунчалик узун навбатларда ёнилғи қуйиш учун кечгача кутишимиз керак бўлиши мумкин”, — деди навбатда турганлардан бири.
Маълумот ўрнида, Шри-Ланка 1948 йилда мустақилликка эришганидан бери энг ёмон иқтисодий инқирозни бошдан кечирмоқда.
Коронавирус пандемияси асосий валюта манбаи бўлган туризм секторига зарба берди ва Шри-Ланка етарлича ёқилғи сотиб ололмади.
Мамлакатда озиқ-овқат, асосий эҳтиёжлар, дори-дармон, газ етишмайди. Шри-Ланканинг кўплаб ҳудудларида ёқилғи йўқлиги сабабли доимий равишда электр таъминотида узилишлар кузатилмоқда. Шу билан бирга, орол давлатининг ташқи қарзи 51 миллиард долларга баҳоланмоқда.
«Улашинг»
