EFFECT.UZ – ҲАҚИҚАТ УЧУН!
Сўнгги янгиликлар
“Саммит учун айнан Самарқанднинг танланишида чуқур рамзий маъно бор” – Анвар Миркомилов

“Саммит учун айнан Самарқанднинг танланишида чуқур рамзий маъно бор” – Анвар Миркомилов

Ушбу ҳафтанинг энг муҳим сиёсий тадбири азим Самарқанд шаҳрида 15-16 сентябрь кунлари Шанхай ҳамкорлик ташкилоти давлат раҳбарларининг 22-саммити бўлиб ўтади. Шу ҳақда “Тараққиёт стратегияси” маркази эксперти Анваржон Миркомилов ўз фикрларини билдирди.

ШҲТ фаолиятида ўзаро манфаатли иштирок этиш масаласининг стратегик хужжатларда ифодаланиши

Ҳозирга қадар Ўзбекистон ШҲТ саммитларига уч маротаба (2005-2006, 2009-2010 ва 2015-2016) мезбонлик қилган бўлса барчаси пойтахтимиз Тошкент шаҳрида ўтканлигини қайд этиш лозим. Бу сафарги манзил кўҳна ва ҳамиша навқирон Самарқанд шаҳри сифатида танланди. Ўзбекистон раислик қиладиган бу сафарги анжуманга айнан Самарқанд шаҳрининг танланишида ҳам чуқур рамзий маъно мавжуд.

Ушбу қадимий ва навқирон шаҳар миллий давлатчилигимиз ва умуман, жаҳон цивилизацияси тарихида алоҳида ўринга эга. Амир Темур бобомиз асос солган шаҳар “Буюк ипак йўли” йўлининг чорраҳасида жойлашган бўлиб, йигирма етти давлатни ўз ичига олган йирик салтанатнинг пойтахти сифатида кўп йиллар сиёсий ва дипломатик марказ вазифасини бажарган. Бу ерда дунёга машҳур олимлар етишиб чиққан, кашфиёт ва ихтиролар қилган, илм-фан билан машғул бўлиб ҳозирда жаҳон маданий меросидан ўрин олган бетакрор асарлар яратган.

Бугунги Самарқанд ҳам ҳар жиҳатдан тарихий анжуман бўлиши кутилаётган шу каби йирик тадбирларни юқори савияда ташкил этиш ва мезбонлик қила олиш салоҳиятига деб ҳисоблайман. Ушбу заминда шаклланган қутлуғ анъаналарни изчил давом эттирган ҳолда, охирги йилларда уни янада кўркам ва обод қилиш, чинакам дипломатия марказига айлантириш бўйича кенг кўламли ишлар амалга оширилди.

Мазкур анжуманнинг ўзи хос жиҳатларидан бири бутун дунёда рўй берган пандемиядан сўнг саммитда мамлакат раҳбарлари сўнгги уч йилда биринчи марта юзма-юз тўпланишади. Бу эса пандемия даврида тўпланиб қолган минтақавий ва глобал муаммоларни муҳокама қилиш учун қулай фурсат ва самарали майдон вазифасини бажаради.

Иккинчидан, учрашувнинг муҳим жиҳатларидан бири бўлиши кутилаётган воқеа бу ташкилотнинг кенгайиши билан боғлиқ жиҳат. Бунда Эроннинг мажбуриятлари бўйича Меморандум имзоланиши кутилмоқда. Мазкур хужжат Эронга ШҲТга аъзо давлат мақомини тақдим этиш масаласини ҳал қилиш учун асос бўлиб хизмат қилади. Яъни, Эрон томони 2023 йилги саммитда, агар у барча мажбуриятларини бажарса, ташкилотга тўлиқ аъзо сифатида қўшилиш имкониятига эга бўлади.

Учинчидан, ШҲТнинг кузатувчи ва мулоқот бўйича шерик давлатлари аъзолигини кенгайтириш тўғрисида қарор қабул қилиниши кутилмоқда.

Тўртинчидан, Шанхай ҳамкорлик ташкилоти аъзо давлатлари ўртасида узоқ муддатли яхши қўшничилик, дўстлик ва ҳамкорлик тўғрисидаги Шартномани 2023-2027 йилларда амалга ошириш бўйича Кенг қамровли режа қабул қилиниши режалаштирилган.

Мамлакатимизнинг шу каби халқаро ташкилотларда ўзаро манфаатли иштирок этиш масаласи қабул қилинаётган Стратегиялар ва Давлат дастурилари билан муштарак ҳамда уларда ўз ифодасини топганлигини қайд этиш зарур. Жорий йилнинг 28 январь куни қабул қилинган 2022 — 2026 йилларга мўлжалланган Янги Ўзбекистоннинг тараққиёт стратегияси хужжати 93-мақсадида “Мамлакатнинг халқаро муносабатлардаги тенг ҳуқуқли субъект сифатидаги ролини ошириш”, деб белгиланган. Хусусан унда ҳамкор мамлакатлар билан ҳамда халқаро ташкилотлар доирасида минтақавий ва глобал масалалар бўйича мувозанатли, доимий мулоқот олиб бориш, улар билан икки ва кўп томонлама учрашувлар ўтказиш, сиёсий, иқтисодий ва маданий соҳаларда ҳамда турли даражадаги маслаҳатлашувларни ташкил этиш вазифалари белгиланган.

Бу йилги “Инсон қадрини улуғлаш ва фаол маҳалла йили”да амалга оширишга оид Давлат дастурининг 349-бандида Шанхай Ҳамкорлик Ташкилоти саммитига Ўзбекистон раислигини самарали ва фаол амалга ошириш вазифаси алоҳида белгиланган. Унда шунингдек, йирик тадбирларда (халқаро ташкилотлар доирасида ва хорижий ҳамкорлар билан шерикчилик асосида ҳамда икки томонлама конференция, форум, семинар ва давра суҳбатлари) минтақавий ва халқаро масалалар бўйича Ўзбекистон позицияси ҳамда глобал ташаббусларини илгари суриш каби фаолиятни ташкил этиш қайд этилган.

Юқорида қайд этилган мақсад ва вазифалардан келиб чиқиб, Ўзбекистон томонидан ШҲТга раислик даврида барча  ҳамкорлик соҳаларида 80дан ортиқ тадбирлар ўтказилди. Мазкур ишларнинг натижаси сифатида бўлажак саммитда имзолаш учун 30дан ортиқ ҳужжат тақдим этилиши режалаштирилган.

Мухтасар айтканда, кутилаётган анжуман ШҲТнинг тарихига муҳим ижобий ўзгаришларга асос бўлиб, барча мамлакатлар учун ўзаро фойдали, самимий мулоқот, конструктив ва дўстона руҳда ўтишига ишончим комил.

«Улашинг»

  • Смайлы и люди
    Животные и природа
    Еда и напитки
    Активность
    Путешествия и места
    Предметы
    Символы
    Флаги
Кликните на изображение чтобы обновить код, если он неразборчив

RATING