Qidirish

11:49 / 2025-07-26 257 0 Ҳодисалар

Фориш тумани аҳолиси сувсизлик туфайли оғир аҳволда

Таҳририятимизга Жиззах вилояти Фориш туманида истиқомат қилувчи фуқаролардан мурожаат келиб тушди.

world-news

Маълум қилинишича, Жиззах вилояти, Фориш тумани, Ўзбекистон МФЙ аҳолиси бир неча ҳафталардан буён қаттиқ иссиқда ичимлик сувисиз қолган. Ҳарорат 40°С дан ошган бир пайтда аҳоли соатлаб эмас, кунлаб сув кутади. Энг аламлиси, бу каби оғир шароитда ҳам одамлар ҳаёт учун зарур бўлган сувни пулга — ҳар бир автоцистерна учун тахминан 120 000 сўмдан сотиб олишга мажбур бўлмоқда.

Муаммонинг сабабини сўраганимизда, турли гап-сўзлар айтилади: “мотор куйган”, “сув таъминотига масъуллар эътиборсиз”, “жаҳл қилиб ишдан кетган ходимлар бор” дейишади. Лекин энг кўп тилга олинаётган ва жиддий қаралиши лозим бўлган масала — Фориш туман сув таъминоти бўлимига янги раҳбар этиб тайинланган Амир Нишонов келганидан кейин бу муаммо янада кучайгани ҳақидаги иддаолардир.

Бу иддаолар тасдиқланадими ёки йўқми — аниқ бир муносабат, расмий баёнот, жамоатчилик олдида очиқчилик ҳозирча йўқ. Аҳоли қийналаяпти. Болалар, қариялар, беморлар сувсиз қолмоқда. Бирорта мутасадди чиқиб на сабабни, на ечимни айтаяпти.

Қачонгача аҳоли турмуши эътибордан четда қолади? Қачон жавобгарлик ва тизимли ечимлар бўлади? Савол кўп, бироқ жавоб йўқ.

Изоҳлар 0

Фикр билдириш