“Лекин иккитаси — Модрич ва Кроос ҳақида алоҳида тўхталмасликнинг иложи йўқ” — Каземиро “Реал Мадрид” билан хайрлашди
Бугун “Реал Мадрид” Карлос Каземиронинг хайрлашув маросимини ташкил қилди. Унда Каземиро ва Флорентино Перес сўзга чиқиб, кўзёшларини тийиб туролмади. Клуб президенти Перес Каземирога олтин нишон тақдим қилди.
“Мен чин юракдан гапиришга ҳаракат қиламан. Кўп титулларни қўлга киритганман, лекин энг зўри — ҳар куни машғулотларга чиққанимда “Худога шукур” айтиш. Унвонларни қўлга киритдим. Буларнинг барчаси оиламнинг ва жамоадошларимнинг ёрдами эвазига. Менга иккита гўзал фарзанд туғиб берган хотиним, президент ва барча жамоадошларимга катта раҳмат.
Уларсиз мен юқори натижаларга эриша олмасдим. Лекин иккитаси — Модрич ва Кроос ҳақида алоҳида тўхталмасликнинг иложи йўқ. Улар билан футбол ўйнашни жуда ёқтираман, бир кун келиб мен бу клубга ёрдам бериш учун қайтаман”, деди Каземиро.
2013 йилнинг 20 апрелида Каземиро Моуриньо қўл остида “Мадрид” сафида дебют қилган эди. Аммо 2014 йилнинг 8 апрелида бразилиялик футболчи “қаймоқранглилар” билан келажагини белгилаб берувчи спектакл қатнашган эди.
Каземиро қачон “Манчестер Юнайтед”да дебют қилади?
Marca хабарига кўра, Каземиро “Манчестер Юнайтед”да Поль Скоулз каби 18-рақамда ҳаракат қилади. Каземиронинг дебютини ҳали кутиш керак. Бразилиялик футболчи хен Хагга бугун “Ливерпуль” ва “Юнайтед” ўртасидаги “Олд Траффорд”да бўлиб ўтадиган Премьер лига “классика”сида қатнаша олмаслигини айтган. Агар барча ҳужжатлар жойида бўлса, у 27 август, шанба “Саутгемптон”га қарши ўйинда майдонга тушади.
Маълумот учун, Каземиро “Реал Мадрид” сафида 336та ўйин ўтказиб, 289тасида асосий таркибда тушган. У иштирок этган ўйинларнинг 228тасида ғалаба қозонган, 55 дуранг ва 53 мағлубият қайд этган. У 31та гол урган ва 18та соврин қўлга киритган: 5та Чемпионлар лигаси, 3та Лига, 3та Европа Суперкубоги, 1та Испания кубоги, 3та клублар ўртасидаги Жаҳон чемпионати ва 3та Испания Суперкубоги.
Эслатиб ўтамиз, “Манчестер Юнайтед” бразилиялик футболчига қизиқиш билдирганини эълон қилганидан бир ҳафта ўтиб, Каземиро “Реал” билан хайрлашди.
«Улашинг»
