title

Ижтимоий тармоқларда Тошкент вилоятида (Ўртасаройда) “Док-1 Макс” дори воситасини истеъмол қилган 2 ёшли бола вафот этгани тўғрисида хабар тарқалди. Ушбу хабар юзасидан Тошкент вилояти Соғлиқни сақлаш бошқармаси муносабат билдирди.

Маълум бўлишича, ҳозирги кунгача Республика шошилинч тез тиббий ёрдам илмий марказининг Тошкент вилояти филиалига “Док-1 Макс” сиропи истеъмоли натижасида заҳарланиш белгилари билан 9 нафар бола олиб келинган.

Улардан 5 нафари соғайиб, уйига қайтарилди, 4 нафарининг аҳволи эса барқарор ҳолатда, уларга тегишли стандартлар асосида муолажалар давом эттирилмоқда.

Тошкент вилоятидаги соғлиқни сақлаш муассасаларида шу пайтгача “Док-1 макс” препаратидан заҳарланиш туфайли ўлим ҳолати кузатилмаган.

“Ҳозирда ҳудудлардаги барча дорихоналарда ҳуқуқни муҳофаза қилувчи органлар вакиллари ва туман-шаҳар тиббиёт бирлашмалари ходимлари томонидан ўрганиш олиб борилиб, “Quramax” компанияси томонидан ишлаб чиқарилган дори воситалари йиғиштириб олинган.

Аҳоли орасида дори-дармонларни шифокор кўрсатмасисиз, палапартиш истеъмол қилишнинг салбий оқибатлари бўйича шифокор ва патронаж ҳамширалари томонидан уйма-уй юриб, тушунтириш олиб борилмоқда. Бу жараёнда хонадонлардаги шахсий дори қутилари ҳам кўздан кечирилмоқда”, — дейилади хабарда.

Эслатиб ўтамиз, Самарқандда 18 нафар бола сиропни қабул қилганидан сўнг, Қашқадарёда 1 нафар, Фарғонада бир нафар бола вафот этди. Сирдарё вилоятида 7 нафар бола сиропдан заҳарланган. Шундан сўнг, Соғлиқни сақлаш вазири Амрилло Иноятов Ўзбекистонда “Quramax” дори воситалари сотилишини тўхтатиш бўйича кўрсатма берди.