Водил санаторияси атрофидаги саволлар: Мурожаатлар ечимсиз, текширувлар шошилинч, прокуратура текшируви суд жараёнига аралашувми: Вазиятдан ким манфаатдор?

Водилдаги санатория бўйича Президент Администрацияси, Бош прокуратура, ДХХ, Соғлиқни сақлаш вазирлиги ва Қонунчилик палатасига юборилган бир нечта видео ва ёзма мурожаатлар қонуний тарзда ўрганилиши кутилган эди. Бироқ бу амалий натижа бермади.

Аксига олиб, 2025 йил 24 ноябрда Фарғона вилояти прокуратураси томонидан №10.1/25-сонли тақдимнома киритилди. Унга асосан, 27 ноябрда вилоят Соғлиқни сақлаш бошқармаси бошлиғи Б.Примқуловнинг буйруғи билан Водил болалар силга қарши курашиш санаториясида хизмат текшируви бошланди. Текширув 3 йиллик ҳужжатларни қамраб олди ва тадбиркор жараёнда иштирок этиш ҳаққини сўради.

Шу билан бирга, асосли савол туғилади:

Суддаги низо вақтида, нега прокурор “тадбиркор аризаси асосида” деб тақдимнома киритиб, хизмат текширувини бошлади?

Бу ҳолат Прокуратура тўғрисидаги қонун, Мурожаатлар тўғрисидаги қонун ва маъмурий жараёнлар ҳамда манфаатлар тўқнашувини тартибга солувчи меъёрларга зид келиш эҳтимолини кучайтиради. Суд жараёни давом этаётганда маъмурий органларнинг шошилинч ҳаракатлари холислик тамойилига шубҳа туғдиради.

2025 йил сентябрдан буён санаторияда 130 дан ортиқ ходим меҳнат ҳуқуқлари бузилаётгани, иш шароитлари ёмонлашгани, болалар хавфсизлиги таъминланмаётгани юзасидан бир неча марказий идораларга мурожаат қилинган. Бироқ ҳалигача Президент Администрацияси, Бош прокуратура ёки соҳавий идоралар томонидан мурожаатларнинг холис ўрганилгани бўйича амалий натижа кўринмаяпти.

Мурожаатлар фақат “қабул қилинди” деган ижро хатларида қолмоқда. Бу эса “Фуқароларнинг мурожаатлари тўғрисида”ги қонуннинг 10-, 12-, 17–22-моддалари талаблари бузилаётганини кўрсатади.

Асосий саволлар ҳали ҳам очиқ қолмоқда:

• Нега юборилган мурожаатлар бўйича ўз вақтида жавоб хатлари берилмаяпти?
• Нега ўрганишлар белгиланган муддатларда амалга оширилмаяпти?
• Нега болалар ва ходимлар ҳуқуқларининг дахлсизлиги кафолатланмаяпти?

Конституциянинг 26-, 37-, 43-, 64-моддаларида инсон қадри, меҳнат ҳуқуқлари ва болалар ҳимоясига оид кафолатлар аниқ белгилаб қўйилган бўлса-да, амалда мазкур ҳуқуқлар бузилиши юзасидан холис ва манзилли ўрганиш кузатилмаяпти.

Бу вазиятдан келиб чиқиб, қуйидаги вазифаларни шошилинч амалга ошириш зарур:

1. Барча мурожаатлар бўйича холис, шаффоф ва мустақил ўрганишни ташкил этиш.
2. Прокуратура тақдимномаси асосида ўтказилаётган текширувнинг манфаатлар тўқнашувига оид жиҳатларини баҳолаш.
3. 130 дан ортиқ ходимлар ва санатория тарбияланувчиларининг ҳуқуқлари бузилиши бўйича алоҳида комиссия тузиш.
4. Мурожаатларни кўриб чиқиш муддатлари ва жавоб хатлари тартибига қатъий риоя этилишини таъминлаш.
5. Суд жараёнига маъмурий босим сифатида талқин қилиниши мумкин бўлган ҳаракатларни тўхтатиш.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг