Ҳиндистоннинг Ченнаи шаҳри мезбонлик қилган 44-Бутунжаҳон шахмат Олимпиадаси ғолибига айланган Ўзбекистон терма жамоаси бугун, 11 август куни тунда Тошкентга қайтиб келди. 

Шахматчиларни Тошкент халқаро аэропортида уларнинг яқинлари, Ўзбекистон ҳукумати вакиллари, оммавий ахборот воситалари ҳамда мухлислар кутиб олди.

Чемпионларни Ислом Каримов номидаги “Тошкент” халқаро аэропортида Ўзбекистон Республикаси Бош вазири Абдулла Арипов, вазирлар Озодбек Назарбеков, Адҳам Икромов, Тошкент шаҳар ҳокими Жаҳонгир Ортиқхўжаев ва Осиё Олимпия Кенгаши вице-президенти Отабек Умаров, спортчилар ва маданият-санъат соҳаси вакиллари, чемпионларнинг ота-оналари, жамоатчилик вакиллари кутиб олди. 

Ўзбекистон президентининг шахматчиларга йўллаган табригини бош вазир Абдулла Арипов ўқиб эшиттирди. Шундан сўнг, шахматчиларга 600 млн сўмлик пул мукофотлари ҳамда “Equinox” автомашинаси калитлари топширилди.

Эслатиб ўтамиз, Ўзбекистон эркаклар терма жамоаси ҳал қилувчи турда Нидерландияга қарши баҳс олиб бориб, 2,5:1,5 ҳисобида ғалаба қозонган эди.

Мазкур ғалаба орқали Ўзбекистон эркаклар терма жамоаси олтин медаль масаласини ҳал қилган ва ўз тарихида илк бор Олимпиада чемпионига айланганди.

Шахмат бўйича Ўзбекистон аёллар терма жамоаси эса сўнгги турда Коста-Рика устидан ғалаба қозониб (2,5:1,5), олимпиадани 162 жамоа орасида 31-ўринда якунлаганди.