Сўнгги янгиликлар
Туркиядаги Халқ кутубхонаси жаҳон кутубхоналари учун андаза бўлмоқда
Иқтисодчи Отабек Бакиров Ўзбекистонда меҳнат таътили кунлари 24 кундан 21 кунга камайтирилди деб ёзди, аслида эса 15 кундан 21 кунга оширилган ва тўланадиган маблағ ҳам кўпайтирилган бўлиб чиқди
Ҳайвон ҳам бунчалик хўрланмайди – Оққўрғондаги зўравонлик ҳақида очиқланмаган фактлар…
Шавкат Мирзиёев Мудофаа саноати агентлигининг Инновацион технологиялар марказига ташриф буюрди
Ҳар қандай масалага қулай позицияда эмас, ҳар томонлама ва холисона ёндошиш керак – Насимбек Азизов
Қурилиш майдонида одам ҳалок бўлган «Аския Cитй»да 5 йилдан буён ноқонуний қурилиш давом этаётгани маълум бўлди
Россияда самолёт қаттиқ қўниши оқибатида икки киши ҳалок бўлди
Нурота тумани «Мурувват» уйида ёш шоир Шоди Ражабовнинг «Ҳаётни севинг» номли шеърий тўпламининг тақдимоти бўлиб ўтди
«Хато 100 фоиз ўзимда, ҳеч қандай йўл билан ўзимни оқламайман. Аммо позициямни ўзгартирмайман» — Зулматда ўтириш яхшилигини айтган депутат билан суҳбат
Депутат Effect.uzʻга берган интервьюсида, ўзини «машҳур» қилган постлар юзасидан жамоатчиликка изоҳ берди. Бундан ташқари у нима учун қамоқда ўтиргани, нега лавозимини тарк этганини ҳам очиқлади.
Effect.uz мухбири Аброр Эшонхонов Халқ депутатлари Янги Наманган тумани Кенгаши котибияти мудири, депутат Музаффар Жамолитдинов билан суҳбатлашди.
Депутат Facebook саҳифасида дастлаб ижтимоий тармоқларда газ, элект таъминотидаги узилишлар ва газ қуйиш шохобчаларидаги навбатлардан шикоят қилаётган фуқароларга атаб, пост жойлаган эди. Шундан сўнг, унинг пости кенг муҳокамаларга сабаб бўлди.
«Шамда ўтирсанг ҳам уйингда ўтир, ИИБни камерасида эмас. Совуқда ўтирсанг ҳам бола-чақангни олдида ўтир, «Миллий хавфсизлик» — (МХХ Президент фармонига кўра, 2018 йил қайта ташкил этилиб, ДХХ деб номланган эди) камерасида эмас. Метан «заправка»да навбатда турсанг ҳам майли Уйчи «турмани» «санчасти»да навбатда турма.
Маълумот учун, Уйчи «турмани» камералари иссиқ ва ёруғ. У ерда ҳеч қачон «свет» ўчмайди камераларга совуқ кирадиган очиқликда эмас. Ҳамма жойи ёпиқ. Хулоса чиқаринг», — деб ёзганди Жамолитдинов.
7 декабрь куни депутат аввалги постига изоҳ бериб, одамларга ўз мақсадини ифодалаб беролмаганини ёзган. Шунингдек, у 10 ой давомида қамоқда сақланганини маълум қилган.
«Депутатлик ваколатим давомида жами 16 та фуқарога нисбатан қўзғатилган жиноят ишларида фуқароларни ҳуқуқ ва манфаатларини ҳимоя қилиш учун жамоат ҳимоячиси бўлиб иштирок этганман.
Шундан 6 та фуқарони ўз кафиллигимга олганим ва уларга қамоқ билан боғлиқ бўлмаган жазо тайинлаш ҳақида судларга киритган илтимосномаларим судлар томонидан қаноатлантирилиб ўша фуқаролар ҳозирда жамиятдан ажралмаган ҳолда ишлаб ўқиб юрибди (видеоматериаллар ҳамда судларни ҳукмлари жойланади).
Мен ўзим сайланган округимдаги фуқаролар билан хонадонбай ва фуқаробай ишлашда қатор ишларни сайловчилар билан бирга амалга ошириб келганман.
Бугунги очиқлик сиёсатида фикр билдирган ва муаммоларни айтган фуқаро қамалмаслигини аксинча фуқаролар кўтарган муаммоларни бартараф этиш чоралари кўрилаётганини барча кўриб билиб турибди.
Бугунги давлат сиёсати шу даражада инсонпарварки, халқпарварки ҳатто мен ўзим ҳам битта қўйган постим ортидан одамларни талқини ва танқидини муҳокама қилмасдан депутатлик ваколатимни муддатидан аввал тугатиш ҳақида ариза бердим», — деб ёзди Жамолитдинов.
Депутат Effect.uz'га берган интервьюсида, ўзини «машҳур» қилган постлар юзасидан жамоатчиликка изоҳ берди. Бундан ташқари у нима учун қамоқда ўтиргани, нега лавозимини тарк этганини ҳам очиқлади.
— Музаффар Жамолитдинов ўзи ким? У қандай қилиб, Янги Наманган тумани Кенгаши котибияти мудири даражасигача кўтарилди?
Мен 1990 йилда Наманган шаҳрида туғилганман. Сайловчиларнинг овозини сайланганмиз. Депутатлик фаолиятимни олиб бораётган вақтимда Янги Наманган тумани ташкил бўлди. Туман ташкил этилганидан кейин, Кенгаши котибияти мудирлигига таклиф қилиндим.
— Музаффар ака депутат сифатида фаолиятингизни 2020 йил бошлаган экансиз, шу ўтган вақт давомида, ўз ваколатингиздан фойдаланиб, қандай амалий ишларни бажардингиз? Сайловчилар, яъни халққа қандайдир ёрдамингиз тегдими?
Мен сайланган округда 3 та маҳалла бор эди: «Ишонч, «Истиқбол», «Келажак тонги». Интервьюни кўргандан кейин, менинг сўзларимга одамлар ишонмаслиги мумкин.
Лекин бу интервьюни маҳалла раислари, маҳалла фаоллари, ўша ҳудудни фуқаролари кўради. Ҳудудда 12 кмдан ортиқ йўллар асфальтлаштирилди.
Мухтарам Президентимизнинг Наманган вилоятига ташрифлари давомида ички йўлларни таъмирлаш учун жуда катта маблағ ажратилди.
Депутатнинг функционал вазифаси — ҳудудидаги муаммоларни амалдаги дастурга киритиб, бажариш деб ҳисоблайман. Ўша қопланган асфальтларни манзилли дастурга киритишга эришганмиз.
«Келажак тонги» ва «Истиқлол» маҳаллаларида бир нечта кўча асфальт бўлди. Нима иш қилган бўлсам биринчи бўлиб халқ учун, аввало Аллоҳ учун қилдим.
Ижтимоий тармоқларда «буни ўзи ким сайлаган?», «шу ҳам депутатми?» деган изоҳларни ўқидим. Айнан улар, мени қилган ишимни кўрсатишга мажбурлашди.
Фаолиятимни биринчи округимдаги маҳаллани сув билан таъминлашдан бошлаганман, бунинг суратларини ўзимни Telegram каналимга ҳам жойлаганман.
Сув тармоғи тортилган кўчада, йўқ эди... Ўша ерда йўл очтирдик. Мен сайланган округдаги энг оғир ҳудуд ўша жой эди, мен ўша жойдан иш бошлаганман.
Фуқаролар менга кўчадан асосий магистраль йўлга олиб чиқувчи йўлни кўприк солиб бериш таклифи билан чиқишди. Улар агар кўприк қурилса асосий йўлга чиқувчи йўл 1,5 кмдан 200 метргача қисқариши мумкинлигини айтишди. Бу масалани ҳал қилиш, жуда қийин бўлди.
Закангни бошқа томонида яшовчи фуқаролар кўприк қурилишига қарши эди, йўлни бўёғи эса «кўприк қуриб бер» деган. Энди уни бирор-бир манзилли дастурга киргизиб бўлмаса...
«Минтақа йўл» мутахассислари ҳудудга келди, аммо бу ишни қилишга имкон йўқлигини айтишди. Сайловчилар олдида ёлғончи бўлиб қолмай деган мақсадда, ўз чўнтагимдан бўлса ҳам қилиб бердим.
Ҳозир иккита томон ҳам муросага келган, аммо кейинчалик аҳоли яна талаб қўйди. Натижада йўллар бутунлай асфальт ҳам қилинди.
Депутатлик фаолиятим давомида 16 та судда жамоат ҳимоячиси сифатида қатнашган бўлсам, 6 та жиноят иши бўйича судда судланувчини ўз кафиллигимга олиб, озодликдан маҳрум қилиш билан боғлиқ бўлмаган жазо тўғрисида илтимоснома киритдим.
Шундан сўнг, 6 та нафар бола суд залидан озод қилинди. Яқинда президентимизнинг «Маҳалла инфратузилмасини яхшилаш тўғрисида» қарорлари чиқди.
Сектор билади, мана шу дастурни уч кун ухламасдан тайёрладик. Бу менинг вазифам эмас эди, лекин у ерда ким муаммоларни ҳимоя қила олса ўшанинг таклифи дастурга киритилишини кўриб, кетмадим.
Натижада, шу йилнинг ўзида «Келажак тонги» маҳалласида 4,5 км электр тармоғи тортилиб, трансформатор ўрнатилди, «Ишонч» МФЙда 3 км йўл асфальт қилинди, магистраль йўлдан ўтган қувурдан сув сизиб чиқарди, яъни кўп авария ҳолатлари кузатиларди, бу муаммони ҳам биринчи даражага чиқардик.
«Ишонч» МФЙда 2023 йилда электр тармоғини тортиш, поликлиника қуриш режалаштирилган. Шунинг ҳаммасини ўзим қилганман демоқчи эмасман, буни ўша ердаги тадбиркор ва фаоллар билан биргаликда қилдим. Энг катта ютуғим — мен сайланган ҳудудда депутат қабулхонаси ташкил қилинган.
Қабулхона очиш депутатнинг мажбуриятига кирмайди. Одамлар мени қидириб юрмаслиги учун қабулхона очганман, ишлаш янада осон бўлиши учун мурожаат қутиларини ташкил қилганман. 3 та маҳалла учун Telegram'да гуруҳ очиб қўйилган. Аслида нима қилганлигимни халқни ўзидан сўраш керак.
— Ана энди Facebook саҳифангизга жойлаган постингизга тўхталиб ўтишимизга тўғри келади. Кузатиб чиқдим ижтимоий тармоқларда анча фаол экансиз. Айнан жамоатчиликнинг муҳокамасига сабаб бўлган постни эълон қилганингиздан сўнг, сизни ҳаттоки тиктокер ҳам деб атай бошлашди. Сизни бу постни ёзишингизга нима мажбур қилди?
— Мен беш йилдан буён битта рақам ишлатаман, рақамим барча фуқароларда бор. Улар диспетчерга телефон қилишса кўтармайди, кейин менга телефон қилишади.
Бир маротаба «электросет»нинг «зами»га телефон қилиб, аварияни бартараф қилиб бердим. Ушбу масала бўйича фуқаролар менга 4 кун давомида такрор-такрор қўнғироқ қилишди.
Охирги кун телефонимнинг қуввати ўчиб қолганди. Уйимга келсам, эшигимни тагида одамлар тўпланишган: “12 соатдан бери "свет" йўқ, эрталаб ўчган ҳали ёнмади» дейишди.
Ўша куни салгина шамоллаган эдим, тўпланган аҳолига бора олмаслигимни тушунтирдим. Аммо бари бир боришга тўғри келди, мен яна «электросетдан» гуруҳ чақирдим. Чироқ ёнди, ёқиб бўлингандан кейин мени ҳақорат қилди, жим кетдим.
Уйга келиб, телефонимни ёқсам, битта фуқаро Facebook'дан «Қўлингдан келмаса, кетмайсанларми, шу ҳам Янги Ўзбекистонми?» деб ёзибди.
5 йил олдин қамоқда ўтирганман, ўшанда бошимдан ўтган ташвиш... Ўзимга ўзим «10 йил «свет»сиз ўтирсам ҳам, уйимда бўлсам бўлди» деганман. Оддий бир «свет»ни ўчишига бесабрсизлик қилтшса, газнинг ўрнига муқобил энергия бор» деган тушунчада ёзгандим.
Бу пост менинг энг катта хатойим, менинг қамалганимни танишларимдан бошқа ҳеч ким билмаслигини, постим шунчалик сиёсий тус олишини билмаганман.
Ижтимоий тармоқларда «таҳдид» килди деган талқин кетди. Имконияти етадиган нарса билан қўрқитиш бу — таҳдид ҳисобланади.
Масалан «8 ёшли бола сани ураман» деса таҳдид ҳисобланмайди-ку тўғрими? Худди шу каби депутатда ҳам қамаб қўйишга ваколати йўқ.
«Огоҳлантирди» деган ҳам талқин кетди, бу огоҳлантириш ҳам эмас. Огоҳлантириш ҳам деб қабул қилайлик, лекин мен оммага зарар бўладиган нарсани айтмабманми?
Хато 100 фоиз ўзимда, ҳеч қандай йўл билан ўзимни оқламайман. Ўша постга «қамоқда эмассиз бола-чақангизни олдида сиз, тарғиботчиларга эргашиб қолманг» деган қўшимчани қўшиб кетишим керак эди.
95 фоиз одам, постни очиб ўқимасдан туриб, танқид қилган. Тўлиқ матнни ўқиганлар бошқача фикрда. Позициямни ўзгартирмайман, ҳали ҳам шу фикрдаман! Шукур қилиш керак.
Ҳукуматни танқид қилиб чиқишяпти, қамаб қўймаяптику тўғрими? Беш йил олдин 4 таси қовушиб, ҳадиксираб «электросет»га боришга қўрқишган.
Оммани ҳеч қачон айбламайман, улар нимани тўғри деб билса, шуни тўғри деб қабул қилди раҳбарият. Шунинг учун мен ҳам муҳокама ҳам қилмасдан, изоҳимда узримни сўрадим.
— Facebook саҳифангизда қуйида эълон қилган постингизга изоҳ ҳам жойладингиз. Унда сиз 10 ой давомида қамоқхонада ўтирганингизни ёзгансиз. Ижтимоий тармоқларда бу сўзингиз ҳам нотўғри талқин қилинган. Оммага ҳақиқатни айта оласизми?
— Жиноят кодексининг 189-моддаси (савдо қоидаларини бузиш ва растрата қилиш) ва 167-модда билан айбланганман. Фирмам бўлган, бюджет ташкилоти билан шартнома имзолаганмиз, маҳсулотни қиммат сотганликда айбланганмиз.
Судда қайтадан баҳоланган, фарқ камайган, чиққан фарқни тўлаб, суд залидан чиқиб кетганман. Адашмасам суд ажрими билан судланганлик олиб ташланган.
— Ушбу постингизга жамоатчиликдан ташқари, ўзингизни ҳамкасбларингиз ҳам муносабат билдиришган, уларга нима деб жавоб берган бўлардингиз?
— Билдим кимни назарда тутаётганингизни, собиқ жамоадошларимдан буни нотўғри қабул қилмасликни сўраган бўлардим. Балки бу сўзларни мени изоҳимни ўқимасдан туриб ёзгандир... Улар биздан ақлли ва савияси баландроқ бўлгани учун шу даражагача чиққан, биздан кўпроқ "кўйнак йиртган". Бу менга етарлича дарс бўлди.
— Ўзбекистондаги айрим қўштирноқ ичидаги амалдорлар ижтимоий тармоқ орқали ўз манзилларига нисбатан керак бўлса ҳар куни танқид тошларини қабул қилиб олишади. Яна айримлари эса узр сўраб вазиятдан чиқиб кетишади. Сиз нега бундай вазиятда тўғридан-тўғри мансабингиздан воз кечишга қарор қилдингиз?
Менинг ҳаётим ўрнак бўлсин деб, ўз хоҳишимга кўра ариза ёздим. Улар омма билан келишилмаса ишлаб бўлмаслигини билсин. Халқнинг фикри билан қизиқмаган одам, мана шундай танқидлар остида қолишини кўрсин!
