Сурхондарёда илк бор гастрономик фестиваль ва миллий таомлар ярмаркаси ўтказилди

Сурхондарё вилояти ўзининг ноёб таомлари ва ошхонаси билан гастрономик туризмни ривожлантириш учун қулай ҳудуд ҳисобланади.

Сурхондарё вилоятининг Термиз шаҳрида биринчи гастрономик фестиваль ва миллий таомлар ярмаркаси бўлиб ўтди. Тадбир вилоят туризм ва маданий мерос бош бошқармаси, Сурхондарё вилояти ҳокимлиги ҳамда ҳамкор ташкилотлар томонидан ташкил этилди.

Тадбирнинг очилиш маросимида Сурхондарё вилояти ҳокими ўринбосари — вилоят туризм ва маданий мерос бош бошқармаси бошлиғи Жўрабек Тўраев ва бошқа мутасаддилар иштирокчиларни воҳа марказида ўтказилаётган илк Термиз гастрономик туризми ва ярмаркаси билан табриклади.

Шунингдек, мамлакатимизда туризмни ривожлантиришга қаратилаётган эътибор қаратилиб, ички ва ташқи туризм хизматларини диверсификация қилиб, ҳажмини кўпайтириш, сайёҳларни мамлакатимизнинг туризм салоҳияти билан яқиндан таништириш учун зарур шароит яратиш, тақдим этилаётган туризм хизматлари сифатини яхшилаш ва жаҳон бозорларида рақобатбардошлигини ошириш муҳим вазифа сифатида белгилаб олингани таъкидланди. Туризм соҳасида фаолият юритаётган тадбиркорлик субъектларига қўшимча имкониятлар берилиб, замонавий хизматлар инфратузилмаси юксалтирилаётгани қайд этилди.

Таъкидлаш жоизки, Сурхондарё вилояти ўзининг ноёб таомлари ва ошхонаси билан гастрономик туризмни ривожлантириш учун қулай ҳудуд ҳисобланади.

Бой тарих ва маданияти, бетакрор меъморий ва археологик ёдгорликлари ва сўлим табиати, шифобахш сувларига эга бўлган воҳа бутун дунё сайёҳларида катта қизиқиш уйғотмоқда.

Мисол учун, жорий йилнинг ўтган даврида вилоятга 824 минг 500 нафар маҳаллий ва дунёнинг 85 давлатидан 143 минг 900 нафар чет эллик сайёҳ келган.

Бундан ташқари, «Ўзбекистон бўйлаб саёҳат қилинг» дастури доирасида 777 минг 700 нафар сурхондарёлик туристлар мамлакатимизнинг турли ҳудудларига саёҳатни амалга оширди.

Маълумот учун, фестиваль доирасида Сурхондарё вилояти Туризм ва маданий мерос бош бошқармаси ходимлари, Термиз давлат университети профессор-ўқитувчилари, туризм йўналишида таҳсил олаётган талабалар ўз иш ва лойиҳаларини тақдим этишди.

Шунингдек, «Болажон бўки» истироҳат боғи ҳудудидаги кўчма саҳнада иштирокчилар томонидан 20 дан ортиқ турли ноз-неъматлар намойиш қилинди. Бундан ташқари, маҳаллий ҳунармандлар томонидан вилоят ҳунармандларининг маҳсулотлари ва эсдалик совғалари кўргазмаси ҳам ташкил этилди.

Қолаверса, илк Термиз гастрофестивали доирасида тадбиркорлар, журналистлар ва блогерлар учун Б2Б учрашувлари, матбуот анжумани, шунингдек, вилоятдаги меҳмонхона ва ресторанларга пресс-тур уюштирилди.

Фестивали якунларига кўра, «Энг яхши дастурхон безатиш» номинациясида Сариосиё тумани ошпазлари ғолибликни қўлга киритган бўлса, Қумқўрғон тумани иккинчи, Музработ тумани эса учинчи ўринни эгаллади. «Миллий таомларнинг энг яхши тури» номинациясида эса Бойсун тумани ошпазлари биринчи, Термиз вилояти ошпазлари иккинчи, Термиз шаҳри ошпазлари эса учинчи ўринга муносиб кўрилди.

Фестиваль концерт дастури ва ғолибларни тақдирлаш маросими билан якунланди.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг