Erdoʻgʻan AQSH xohlasa, Ukrainadagi urushni tezda tugatish mumkinligini bildirdi

Turkiya prezidenti Rajab Toyyib Erdoʻgʻan, agar AQSHning saylangan prezidenti Donald Tramp maʼmuriyati tegishli iroda va niyatni namoyon qilsa, Ukrainadagi mojaroni tezda hal qilish mumkinligiga ishonchi komil ekanini aytdi. Bu haqda “Anadolu” agentligi yozdi.

“AQSH boshchiligidagi baʼzi Gʻarb davlatlarining Ukrainadagi urushni toʻxtatishga qaratilgan saʼy-harakatlari bu mojaroning hal etilishini tezlashtiradi. Biz boshidanoq tinchlik tarafini tanladik, bizni urush tarafdori boʻlishga koʻndirish urinishlariga eʼtibor bermadik va har ikki tomon bilan aloqani davom ettirdik. Shuningdek, Gʻarb bu muammoni diplomatiya yoʻli bilan hal qilish mumkinligiga ishonchimiz komil emasligini ham koʻrdik. Agar Tramp davridagi AQSH maʼmuriyati bu masalaga kelishuv nuqtayi nazaridan yondashayotganini koʻrsak, bu urushga bemalol nuqta qoʻyishimiz mumkin”, dedi Erdoʻgʻan Qirgʻiziston va Vengriyaga tashrifi yakunlari boʻyicha jurnalistlar bilan suhbatda.

Turkiya rahbari koʻproq qurol, koʻproq bomba va koʻproq tartibsizlik bu urushga barham bermasligini taʼkidladi.

“Koʻproq muloqot, koʻproq diplomatiya va koʻproq kelishuv tinchlik eshigini ochadi. Turkiya har ikki tomonni muzokara stoliga oʻtkazishga muvaffaq boʻldi. Biz buni koʻp marta qildik va yana qila olamiz. Bu urush hozir tugashi kerak. Biz oʻz fikrimizni tinchlikka qaratganmiz. Tinchlikka erishish boʻyicha saʼy-harakatlar va bu yoʻnalishda ishlashda davom etadi”, deya qoʻshimcha qildi Erdoʻgʻan.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг