Қурилиш тизимида шаффофлик бўйича берилган ваъдалар қанчалик амалга ошмоқда?

Қурилиш ва уй-жой коммунал хўжалиги вазирлиги 9 декабрь — Халқаро коррупцияга қарши курашиш куни доирасида ОАВ вакиллари, блогерлар, жамоатчилик фаоллари ҳамда соҳа мутахассислари учун «Очиқ эшиклар куни» ўтказди.

Тадбирнинг асосий мақсади — вазирлик тизимида очиқлик ва шаффофликни кучайтириш, коррупциявий хатарларни аниқлаш ва уларнинг олдини олиш бўйича амалга оширилаётган ишларни жамоатчиликка таништиришдир.

Тадбирни вазир ўринбосари Тоир Алиматов очиб, коррупция ислоҳотлар суръатини секинлаштираётган энг катта тўсиқлардан бири эканини таъкидлади. У давлат раҳбарининг «Рақамлаштиришдан қочаётган ҳар бир раҳбар — коррупцияни йўқ қилишга интилмаган раҳбардир» деган фикрини эслаб, вазирликда бошқарув жараёнларини автоматлаштириш, инсон омилини қисқартириш ва жамоатчилик назоратини кенгайтириш устувор вазифа этиб белгиланганини билдирди.

Вазирлик томонидан соҳа бўйича 120 та функция ва жараёнлар таҳлил қилиниб, уларда мавжуд коррупциявий хавфларни камайтириш учун аниқ чора-тадбирлар ишлаб чиқилгани таъкидланди. Шунингдек, Президент топшириғига мувофиқ, қурилиш ва коммунал тизимларда ички назорат бўлинмаларини кучайтириш мақсадида янги штатлар ташкил этилди. Ҳудудларда мустақил ички назорат ходимлари жорий қилиниб, улар бевосита вазирга бўйсундирилгани — соҳада реал назорат ўрнатиш сари ташланган муҳим қадам сифатида эътироф этилди.

Бош прокуратура бошқарма прокурори Мансур Рўзимов ҳам сўзга чиқиб, «Шаффоф қурилиш» тизими натижалари ҳақида гапирди. Унинг айтишича, жараёнлар рақамлаштирилгани сари инсон омили қисқариб, очиқлик ошмоқда. Коррупция агентлиги маълумотларига кўра, сўнгги йилларда вазирликда коррупцион ҳолатларга нисбатан муросасизлик кучайгани тизимнинг ошкоралигига ижобий таъсир кўрсатмоқда.

Кадрлар масаласи ҳам муҳокама қилингани аҳамиятли. Йил давомида 136 та семинар-тренинг ўтказилиб, 491 нафар ходим Антикоррупция академиясининг 1-босқич ўқувларини якунлади, яна 1700 нафари ўқишни бошлади. Манфаатлар тўқнашуви бўйича 4 мингдан ортиқ ходим декларация тўлдирди, қонунга зид ҳолатлар эса Одоб-ахлоқ комиссиясига юборилди.

Тадбирда соҳадаги энг муҳим йўналишлардан бири — рақамлаштириш бўйича натижалар ҳам тақдим этилди. «Шаффоф қурилиш» миллий ахборот тизими орқали лойиҳаларни келишиш, экспертиза, тендерлар, қурилиш назорати ва мониторинги тўлиқ электронлаштирилган. Тизимнинг Адлия вазирлиги, ИИВ, Олий суд ва Кадастр агентликлари базалари билан интеграцияси инсон омилини кескин қисқартириб, сўнгги 4 йилда давлат бюджети учун 3,6 трлн сўм тежалишига эришилган.

Бундан ташқари, «Рейтинг» ва «Тендер» электрон платформалари натижалари ҳам оммага тақдим этилди:

– 18 мингдан ортиқ пудрат ва лойиҳа ташкилотлари рейтинг тизимига қамраб олинган;

– 16 мингдан зиёд харидлар электрон тендер орқали ўтказилган;

– ҳар бир тендерда қатнашувчилар сони ўртача 4 нафардан ошган.

Бу кўрсаткичлар соҳада рақобат ва шаффофлик ошаётганини кўрсатади.

Коммунал соҳани рақамлаштириш бўйича ишларда ҳам сезиларли ўзгаришлар кузатилмоқда. «Кўп квартирали уйларни бошқариш органларининг электрон реестри» ишга туширилиб, бошқарув органлари ҳақида маълумотлар аҳолига очиқ тақдим этилмоқда.

«Менинг уйим» биллинг тизими такомиллаштирилиб, тариф ўрнатиш, мурожаатлар билан ишлаш ва ҳисоботлар шаффоф тарзда олиб борилмоқда. Яна бир муҳим янгилик — бошқарув органлари билан боғлиқ жараёнлар Давлат хизматлари орқали амалга оширилаётгани, бу эса инсон омилини камайтириш ва очиқликни таъминлашга хизмат қилмоқда.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг