“Нима Конституциявий Суд — касалхона реанимациясими ёки Соғломлаштириш Марказими” – Соғлиги ёмонлашган Олий суднинг собиқ раиси Конституциявий судга судья бўлди
Ўзбекистон Республикаси Олий суди раиси Козимжон Камилов саломатлиги туфайли ўз хоҳиши билан эгаллаб турган лавозимидан озод этишни сўраб мурожаат қилган. 10 август куни бўлиб ўтган Сенатнинг 30-ялпи мажлисида бўлиб ўтган муҳокама натижасида Камиловни Ўзбекистон Республикаси Олий суди раиси лавозимидан озод этиш тўғрисида қарор қабул қилинди.
Шунингдек, ялпи мажлисда Президент Шавкат Мирзиёев томонидан тақдим этилган Олий суд раислигига номзод муҳокама қилинган. Муҳокама якунида сенаторлар томонидан суд тизимида ҳамда маъмурий органларда раҳбарлик лавозимларида кўп йиллар мобайнида ишлаб келган Бахтиёр Жаҳонгирович Исламов Олий суд раиси этиб сайланди.
Эътиборлиси, сенат ахборотида соғлиги ёмонлашгани туфайли Олий суд раиси лавозимидан олингани айтилган.
Козимжон Камилов 13 июнь куни президент тақдимномасига кўра, мазкур лавозимга беш йил муддатга қайта сайланган эди.
Эндиликда Козимжон Камилов сенат қарори билан беш йил муддатга Ўзбекистон Республикаси Конституциявий судининг судьяси этиб сайланди.
Facebook фаолларидан бири Исмигул Шайҳуддинова ушбу ҳолатга муносабат билдириб, Камиловнинг саломатлиги ёмонлашган бўлса, шифохона ёки нафақага чиқиши кераклиги ҳақида ёзди.
“Безбет сенат, у айримларни орқасини артиб қўядиган тузилмага айланди! (таҳр) Ишдан тепилган собиқ Олий Суд раиси Козим Комилов саломатлиги туфайли ўз аризасига биноан бўшабдимиш, савилей.
Саломатлиги агар ёмонлашган бўлса касалхонага ёки пенсияга кетмай, Конституциявий Судга судья бўп кетадими, безбетлар...?! Нима Конституциявий Суд — касалхона реанимациясими ёки Соғломлаштириш Марказими, савиясизлар!
Иннанкейин, президентимизни қилган кадрлар сиёсатидаги ўзгартиришини қўллаб қувватлаш ўрнига, халқни дарди арзи додларларига асосан президентимиз тепворган кадрни шалтоғини тозалаб, халқни аҳмоқ қилмай, борини бордай гапирларинг, памперс тозаловчи бўлмай!
Агар президентимиз тепвормасалар,ўла қолса бунақалар кетмайдиям, ўз ҳоҳишига кўра ишдан кетишга ариза ёзмайди ҳам, токи Азроил устига келиб омонатни олмагунича, кимни аҳмоқ қилаяпсизлар..?!
Сенат раиси нафақага кетиш вақтингиз яқинлашибди, айни мавриди десак ҳам бўлади! ССВ вазирини оғзига уриб, бор ҳақиқатни гапиртирмай, босим қилган пайтингиздаёқ ўзи маълум бўлганди кетиш вақтингиз яқинлашиб, анча чарчаганингиз”, деб ёзади Исмигул Шайҳуддинова.
Бундан ташқари, Кароматжон Худайбергановна Давлетова беш йил муддатга Ўзбекистон Республикаси Конституциявий судининг судьяси лавозимига сайланди ва шу муносабат билан Ўзбекистон Республикаси Олий суди судьяси лавозимидан озод этилди.
Рахат Аминбаевич Исмайлов беш йил муддатга Ўзбекистон Республикаси Конституциявий судининг судьяси лавозимига сайланди ва шу муносабат билан Ўзбекистон Республикаси Олий суди судьяси лавозимидан озод этилди.
Қуйидагилар:
Жанагул Исмайловна Балкибаева беш йил муддатга;
Аскаржон Бойисович Ғафуров ўн йил муддатга;
Абдуманноб Қўзиевич Раҳимов беш йил муддатга;
Акмал Эргашевич Раҳмонов беш йил муддатга Ўзбекистон Республикаси Конституциявий судининг судьяси лавозимига сайланди.
Сенатнинг тегишли қарорида, ушбу қарор қабул қилинган кундан эътиборан кучга кириши маълум қилинган. Мазкур қарорнинг 2, 3 ва 4-бандлари 2022 йил 24 августдан эътиборан амалга киритилади.
«Улашинг»
