title

Қирғизистондаги Ғалаба чўққисида қолиб кетган россиялик альпинист Наталья Наговицинанинг жасадини 2026 йил ёзига қадар топиш имкони бўлмаслиги мумкин.

Бу ҳақда Қирғизистон Альпинизм ва тошга чиқиш федерацияси президенти Эдуард Кубатов РИА Новости агентлигига маълум қилди.

Маълум қилинишича, Наговицина 2025 йил 12 август куни Тянь-Шань тоғ тизмасидаги энг баланд нуқта — Ғалаба чўққисидан (денгиз сатҳидан тахминан 7,2 минг метр баландликда) тушиш вақтида оёғидан жароҳат олган.

Уни бир неча бор бошқа альпинистлар қутқаришга уринган, бироқ оғир об-ҳаво шароити сабабли бунинг иложи бўлмаган. Қутқарув ҳаракатлари чоғида альпинистлардан бири ҳалок бўлган.

Наговицина ушбу баландликда ухлаш қопи ҳамда оз миқдорда озиқ-овқат ва сув билан қолиб кетган. 25 август куни уни қутқариш бўйича расмий ҳаракатлар тўхтатилган, Қирғизистон Фавқулодда вазиятлар вазирлиги эса уни бедарак йўқолган деб эълон қилган.

Қонунчиликка кўра, уни ҳалок бўлган деб тан олиш фақат кимдир унинг вафот этганини шахсан тасдиқлаганидан кейингина мумкин бўлади.

Наговицина бўйича якуний мақомни аниқлаш мумкин бўлган энг яқин муддат — 2026 йил июль ёки август ойлари бўлиб, бу даврда Ғалаба чўққисида юқори мавсум бошланади, - дейди Кубатов.

Федерация раҳбарининг таъкидлашича, Ғалаба чўққисига қишки чиқишлар альпинизмда энг юқори даражадаги, ўта қийин синов ҳисобланади.

Унинг айтишича, қишки “Қорли барс” дастурини, жумладан, Ғалаба чўққисига қишки чиқишни муваффақиятли амалга оширган альпинистлар сони жуда кам — бор-йўғи уч нафарни ташкил этади. Эрон ва бошқа Осиё давлатлари томонидан қилинган айрим уринишлар эса муваффақиятсиз якунланган.