title

АҚШ президенти Дональд Трамп Давосда бўлиб ўтган Жаҳон иқтисодий форумида Европа сиёсати, Украинадаги уруш, Гренландия масаласи ҳамда АҚШнинг ташқи ва иқтисодий стратегиясига оид кескин баёнотлар билан чиқди. У Европа давлатларини нотўғри йўлда кетаяпти, дея танқид қилди, Гренландия бўйича музокараларни бошлаш ниятини билдирди ва Украина инқирозини ҳал этишда асосий масъулият Европа зиммасига тушишини таъкидлади.

Европа ҳақида

АҚШ президенти Дональд Трамп Европа давлатларидаги ҳозирги вазиятни танқид қилиб, қатор мамлакатлар аввалги қиёфасини йўқотаётганини таъкидлади. Унинг сўзларига кўра, Европа ҳудудларининг айрим қисмлари бугунги кунда таниб бўлмас даражада ўзгарган.

Трамп Европа фаровон бўлишини исташини, бироқ қитъа нотўғри йўналишда ҳаракатланаётганини билдирди.

У Ғарбда иқтисодий ривожланишни таъминлаш деб ҳисобланаётган сиёсат — давлат харажатларини чексиз ошириш, назоратсиз оммавий миграция ва доимий импортга суянишни самарасиз ёндашув сифатида баҳолади.

Европа энергия сиёсати ҳақида

АҚШ президенти Европа ва Буюк Британияни ўз табиий ресурсларидан тўлиқ фойдаланмаётганликда айблади. У Шимолий денгиз соҳилида жойлашган мамлакатлар улкан энергетик захираларга эга эканига қарамай, улардан фойдаланмаётганини таъкидлади.

Трампнинг фикрича, айнан шу омил Европа давлатларида энергия танқислиги ва нархларнинг кескин ошишига сабаб бўлган.

Гренландия масаласи

Дональд Трамп АҚШ Иккинчи жаҳон урушидан кейин Гренландияни Данияга қолдириб, нотўғри қарор қабул қилганини билдирди.

Унинг айтишича, Вашингтон ушбу ҳудудни сақлаб қолиши мумкин эди, бироқ бундай қилинмаган.

Президент Гренландияни харид қилиш бўйича музокараларни бошлаш нияти борлигини таъкидлар экан, бу мақсадда ҳарбий куч ишлатиш режаси йўқлигини алоҳида қайд этди.

Украинадаги уруш ҳақида

АҚШ раҳбари Украинада давом этаётган қуролли тўқнашувни “қонли қирғин” деб атаб, уни тезроқ тўхтатиш нияти борлигини билдирди.

Шу билан бирга, у Россия президенти Владимир Путин тинчлик келишувига тайёр, деган фикрни илгари сурди.

НАТО ва Европа масъулияти ҳақида

Трампнинг айтишича, Украина атрофидаги инқирозни ҳал этишда асосий масъулият НАТО ва Европа давлатлари зиммасига тушади.

У АҚШ географик жиҳатдан минтақадан узоқ эканини ва бу масалада бевосита иштирок этиши шарт эмаслигини таъкидлади.

Бошқа баёнотлар

Дональд Трамп Венесуэладаги вазиятни ижобий баҳолаб, АҚШ бу мамлакат билан ҳамкорликни қадрлашини айтди. Шунингдек, у АҚШни жаҳон иқтисодиётининг асосий ҳаракатлантирувчи кучи сифатида таърифлади ва Америка иқтисодий ўсиши бошқа давлатларга ҳам ижобий таъсир кўрсатишини қайд этди.

Президент ташқи савдода жорий этилаётган божлар АҚШга етказилган иқтисодий зарарни қоплашга қаратилганини билдирди. Унинг сўзларига кўра, маъмурият бир йил ичида федерал харажатларни 100 миллиард долларга қисқартирган, табиий газ ишлаб чиқариш эса тарихий энг юқори кўрсаткичга етган.