Сўнгги янгиликлар
Феруза Муҳаммаджонова: «Пиво фестивали — миллий қадриятларга нисбатан таҳқир»
Давлат олий таълим муассасалари учун тўрт йиллик қабул квоталари белгиланди
Турк Ривиерасининг “жонли” шаҳарлари ҳақида эшитганмисиз?
Юлдуз Усмонованинг қўшиғини куйлаган хонанда жаримага тортилди
Тошкентда «Lacetti» ва «Tracker» тўқнашуви оқибатида бир нафар пиёда вафот этди
Академик лицейларга кириш тест синовлари ўтказилиш санаси ва вақти аниқ бўлди
Янги ўқув йилидан бошлаб В2 сертификати мавжуд бўлмаган хорижий тил ўқитувчилари ишлан бўшатилади(ми?) Сертификат машмашаси қачон тугайди?!
Тошкентдаги кўчалардан бири 1 ойга ёпилди
Феруза Муҳаммаджонова: «Пиво фестивали — миллий қадриятларга нисбатан таҳқир»
Тошкентда ўтказилган пиво фестивали “Миллий тикланиш” демократик партияси вакили Феруза Муҳаммаджонова томонидан танқид остига олинди. У мазкур тадбирни миллий ва маънавий қадриятларга зид, жамият онгига салбий таъсир этувчи ҳолат сифатида баҳолади. Депутат фикрича, бундай фестиваллар хавфли ижтимоий тенденцияга айланиши мумкин.
«Миллий тикланиш» демократик партияси раиси ўринбосари Феруза Муҳаммаджонова Тошкент шаҳрида ўтказилган пиво фестивали юзасидан танқидий баёнот берди. Унинг сўзларига кўра, бу каби тадбирлар жамиятда кенг норозилик уйғотиши лозим, зеро улар миллий ва маънавий қадриятларимизни инкор этишга хизмат қилади.
Муҳаммаджонова таъкидлашича, фестиваль оммавий тарзда ва очиқ жойда ташкил этилган, иштирокчиларнинг катта қисми эса ёшлар бўлган. У айниқса, ушбу тадбирни русийзабон ОАВ кенг ёритгани, ўзбекзабон ОАВ ва жамоатчилик эса деярли сукут сақлаганини алоҳида эътироф этди:
«Тошкентдаги майдон одамлар билан гавжум бўлди. Иштирокчиларнинг аксарияти ёшлар. Русийзабон ОАВлар буни кенг ёритди, ўзбекзабон зиёлилар эса жим. Шаҳарнинг иккинчи чеккасида эса Ислом цивилизацияси маркази қурилмоқда...»
У бундай фестивалларга фақат иқтисодий ёки сайёҳлик жиҳатидан қараш нотўғри эканини, ортида миллий ўзликка нисбатан лоқайдлик ва беэътиборлик яширинганини билдирди. Айниқса, бу каби тадбирларнинг анъанага айланиб бораётгани партия вакилида жиддий хавотир уйғотган:
«Пиво фестивали биринчи марта ўтказилмаяпти. Энди буни ҳар йили ўтказиладиган тадбир сифатида кўз олдига келтираяпмиз. Бу эса хавфли тенденция».
Феруза Муҳаммаджонова бу каби тадбирлар орқали жамият маънавий жиҳатдан босқичма-босқич ўзгаришга юз тутаётганини ва бу ўзгаришлар жиддий оқибатларга олиб келишини қайд этди:
«Бугун пиво, эртага вино, кейин эса ҳеч қандай маданий чекловсиз спиртли ичимликлар барчаси бўлган фестиваллар. Бу орқали жамият онгини ўзгартириш — мураккаб, аммо изчил жараён.»
Партия вакили эркинлик тушунчасини маданият ва маънавият билан чегаралаш зарурлигини уқтирди. Унинг фикрича, эркинлик маданиятсизлик билан аралашиб кетса, бу жамият ўзлигини йўқотишига сабаб бўлади:
«Эркинлик — маънавиятсизлик эмас. Эркинлик маданият, анъана ва жамият эҳтиёжлари билан уйғунлашгандагина ҳақиқий қиймат касб этади.»
Муҳаммаджонова ижтимоий муносабатларда икки юзламачиликка ҳам эътибор қаратиб, айрим ҳолатлардаги жамоавий эътирозлар билан бундай фестиваллар атрофидаги сукутни таққослади:
«Бир дарахт кесилса, жамоатчилик шовқин кўтаради. Аммо пиво фестивали ўтказилса — ҳамма жим. Бу — икки юзламачилик!»
У Тошкентдаги ҳар қандай тадбир мамлакат юрагидаги воқеа сифатида қабул қилинишини таъкидлаб, жамоатчиликни бефарқ қолмасликка чақиради:
«Тошкент — юрак. Унда бўлаётган ҳар қандай воқеа — бутун мамлакат учун кўзгудир. Шу боис, бефарқлик — миллий ўзликдан узилиш демакдир».
Сўнгги сўз сифатида у «Миллий тикланиш» партияси раиси Алишер Қодировнинг қуйидаги фикрини келтиради:
«Дарахт ҳимоясига бирлашгандек, сув, ер, энергия, озиқ-овқат ва вақт — қолаверса ўзлигимизни исрофига қарши ҳам бирлаша олсак эди…»
