title

Ўзбекистон элчиси Фурқат Сиддиқовнинг АҚШнинг Бостон шаҳрига (Массачусетс штати) ташрифи доирасида ушбу шаҳар ва унинг атрофида истиқомат қилувчи ватандошлар билан учрашув ўтказилди, деб хабар бермоқда “Дунё” агентлиги.

Учрашув доирасида ватандошларга Ўзбекистонда улар учун яратилаётган имкониятлар тўғрисида маълумот берилган.

Тадбир давомида Бостон шаҳрида янги ташкил этилган Ўзбек жамоаси “Турон Ассоциацияси”нинг очилиши ҳам бўлиб ўтган. Ассоциациянинг асосий вазифалари орасида Ўзбекистон маданияти ва меросини сақлаш ва уни кенг жамоатчиликка тарғиб қилиш, ватандошлар ўртасида маърифий ва илмий тадбирларни ташкил этиш каби муҳим йўналишлар мавжуд эканига урғу берилган.

Бундан ташқари, Бостон шаҳри ва унинг атрофида истиқомат қилувчи ватандошларимиз учун ташкил этилаётган “Илдиз”онлайн платформасининг тақдимоти ҳам ўтказилган. Платформа, ўз фаолиятини АҚШда ишлайдиган юқори малакали мутахассислар, молия институтлари, университетлар, юридик фирмалар, тадбиркорлар ва инвесторларнинг ташаббусларини қўллаб-қувватлашга йўналтирилган.

Сўнгра ватандошлар ҳамда америкалик ҳамкорлар иштирокида кириб келаётган Наврўз байрами муносабати билан маданий кеча ташкил этилган. Хусусан, тадбирда Гарвард университетининг етакчи олимлари ва институт раҳбарлари иштирок этган.

Уларга Ўзбекистоннинг туристик ва гастрономик салоҳияти, маданий урф-одатлари, бой маданиятнинг ўзига хослиги, шунингдек, ижтимоий-иқтисодий тараққиётда кузатилаётган динамик ўзгаришлар ҳақида махсус видеолавҳалар намойиш қилинган.

Учрашув якунида ватандошлар икки томонлама ҳамкорликни кенгайтириш, Ўзбекистон ва АҚШ ўртасида маданий ва илмий алмашинув дастурларини амалга ошириш, шунингдек, Ўзбекистоннинг АҚШдаги имижини мустаҳкамлашга тайёрликларини билдирган.