title

Илк рейслар жорий йилнинг 9 январидан бошланди. Самолёт Тошкент халқаро аэропортидан Фарғонага сешанба ва пайшанба кунлари 14:20 да, Фарғонадан Тошкентга эса худди шу кунлари 15:45 да учди.

Ушбу йўналиш бўйича шанба кунлари ҳам авиақатновлар йўлга қўйилган бўлиб, Тошкент-Фарғона йўналишида 10:15 да, Фарғона-Тошкент йўналишида худди шу куни 11:40 да парвоз қилади.

«Humo Air» авиакомпанияси томонидан пойтахтдан амалга оширилаётган мунтазам рейслар қатор афзалликларга эга. Бу рейслар транспорт тизимида имкониятларни кенгайтиради, аҳолимизга қулай ва самарали саёҳат қилиш имконини беради.

Бундан ташқари, бизнес, туризм ва сармоя киритиш учун янги имкониятлар очади, меҳмонларни, шунингдек, юқори салоҳиятга ва имкониятга эга бўлган ҳамкорларни ҳам ўзига жалб қилади.

Рейсларнинг жорий этилиши нафақат ҳудуднинг иқтисодий ўсишига ҳисса қўшади, балки маданий алмашинувлар ва ҳамкорликка ҳам хизмат қилади.

«Humo Air» авиакомпаниясини пойтахтдан вилоятимизга йўналиш очилгани билан табриклаймиз. Бу йўналиш Фарғона шаҳрининг ижтимоий, туризм ва ишбилармонлик соҳалари ривожи ва фаровонлигига ижобий таъсир кўрсатади, деган умиддамиз», — деди Фарғона вилояти ҳокими.

Мазкур йўналишдаги парвозлар 180 йўловчига мўлжалланган. Чипталарни флйҳумо.cом сайти орқали бронь қилиш мумкин.

Шунингдек, 10 январь куни «Humo Air»нинг Тошкент-Бухоро-Тошкент йўналиши бўйича ҳам илк парвози бошланади. Ушбу рейснинг учиш вақти Тошкентдан Бухорога 10:15 да, Бухородан Тошкенга эса 12:00 да, ҳафтанинг чоршанба ва шанба кунлари этиб белгиланган.

Вилоят ҳокимлиги мамлакатнинг сайёҳлар учун асосий йўналишлардан бири бўлган Бухоро шаҳрига Тошкентдан тўғридан-тўғри рейслар қатнови йўлга қўйилиши бўйича ижобий муносабат билдирди.

Ҳокимлик вакилининг сўзларига кўра, эндиликда нафақат хорижлик, балки маҳаллий сайёҳлар ҳам ҳамёнбоп нархларда парвоз қилиб, Ўзбекистоннинг бетакрор маданиятига шўнғиш имкониятига эга.

«Сўнгги йилларда турли соҳаларда амалга оширилаётган кенг кўламли ислоҳотлар халқимиз турмуш тарзини яхшилаш, туризм ва ҳудудлараро парвоз маданиятини ривожлантириш учун ҳар томонлама шарт-шароит яратишга хизмат қилаётганини алоҳида таъкидлаб ўтишим керак», – дейди Бухоро вилояти ҳокими ўринбосари.

Қайд этиш жоизки, «Humo Air» лоукостер авиакомпанияси 2023 йилнинг 15 декабридан Ўзбекистоннинг тўртта шаҳри – Нукус, Самарқанд, Урганч ҳамда Қаршига парвозларни бошлаган.

Жорий йил 7 январидан эса авиакомпания Термиз, Қарши, шунингдек, Самарқанд-Урганч-Самарқанд йўналишида қатновларни амалга оширди.

«Humo Air» билан энди одамлар Фарғона ва Бухорога учади. Маълумот ўрнида шуни таъкидлаш жоизки, лоукостер деганда кам буджетли авиакомпания тушунилади.

У компания фаолияти билан боғлиқ барча омилларни оптималлаштириш орқали чипталарни арзон нархларда сота олиш имкониятига эга бўлган авиаташувчидир.