Сўнгги янгиликлар
Туркиядаги Халқ кутубхонаси жаҳон кутубхоналари учун андаза бўлмоқда
Иқтисодчи Отабек Бакиров Ўзбекистонда меҳнат таътили кунлари 24 кундан 21 кунга камайтирилди деб ёзди, аслида эса 15 кундан 21 кунга оширилган ва тўланадиган маблағ ҳам кўпайтирилган бўлиб чиқди
Ҳайвон ҳам бунчалик хўрланмайди – Оққўрғондаги зўравонлик ҳақида очиқланмаган фактлар…
Шавкат Мирзиёев Мудофаа саноати агентлигининг Инновацион технологиялар марказига ташриф буюрди
Ҳар қандай масалага қулай позицияда эмас, ҳар томонлама ва холисона ёндошиш керак – Насимбек Азизов
Қурилиш майдонида одам ҳалок бўлган «Аския Cитй»да 5 йилдан буён ноқонуний қурилиш давом этаётгани маълум бўлди
Россияда самолёт қаттиқ қўниши оқибатида икки киши ҳалок бўлди
Нурота тумани «Мурувват» уйида ёш шоир Шоди Ражабовнинг «Ҳаётни севинг» номли шеърий тўпламининг тақдимоти бўлиб ўтди
Британиялик миллиардер «МЮ»нинг 25 фоиз акциясини сотиб олди. У клубни «каламушлар»дан тозалашга ваъда берди
Бир неча соат олдин «Манчестер Юнайтед»нинг 25 фоиз акцияси британиялик миллиардер Жим Ратклифф томонидан 1,25 миллиард фунт стерлинг эвазига сотиб олингани ҳақида эълон қилинди. Йўқ, афсуски йўқ! Ака-ука Глейзерлар (Жоэл ва Аврам) клубдан бутунлай кетишмади, аммо улар энди «питбол-митбол»га аралашишмайди...
Ратклифф ким?
Жеймс Ратклифф — 29,6 миллиард фунт стерлинг бойлиги билан Британиянинг иккинчи энг бой одами ҳисобланади.
Собиқ кимё-муҳандиси Ратклифф конгломерат синтетик мойлар ва пластмассалардан тортиб инсулин ва антибиотиклар учун махсус идишларни ишлаб чиқарадиган “Ineos” компаниясининг асосчиси.
Кимё-саноатида ишлари “бовиллаб” кетган “бират” футболни ҳам яхшигина тушунади ва ушбу соҳада ҳам “соққа” қилишни билади. Ҳозирда у Франциянинг “Ницца” ва Швейцариянинг “Лозанна” жамоаларининг хўжайинидир.
Ратклифф «Манчестер Юнайтед»га нималарни ваъда қилмоқда?
Ратклифф зудлик билан “Манчестер Юнайтед”га 300 миллион доллар сармоя киритади, бу маблағ “Олд Траффорд”ни ривожлантиришга йўналтирилади.
Ҳужжатлар расман имзоланмасдан туриб, “қизил иблислар”да кадрлар алмашинуви бошланди: ноябрь ўрталарида клуб бош директори Ричард Арнолд истеъфога чиқди, унинг ўрнини вақтинча клуб бош маслаҳатчиси Патрик Стюарт эгаллади. Келишув якунлангач, бошқа раҳбарлар ҳам кетиши кутилмоқда.
Хусусан, Ратклифф “МЮ”нинг асосий муаммоси — бош мураббий Эрик Тен Хаг эканлигини айтиб, унга чиқиш эшиклари кўрсатилишини айтди:
“Клубда биринчи қиладиган ишим, Эрик Тен Хагни бўшатиш, мен шунинг учун жамоани сотиб олдим”.
Шунингдек, у “Манчестер Юнайтед”ни аввалги ўрнига қайтаришга ваъда берди:
“Манчестер Юнайтед” бошқаруви бизга ўтганидан хурсандман. Тан олиш керак жамоа охирги йиллар ўзининг хақиқий даражасини кўрсатолмаяпти.
Эндиликда бошқача йўл тутамиз, яъни клубни янада такомиллаштиришга ёрдам бериш, шунингдек, “Олд Траффорд”га сармоя киритиш учун “Ineos” спорт гуруҳининг тажрибасидан фойдаланамиз.
Сизларни ишонтириб айтаманки, бу ерга узоқ муддатга келдик ва бизни олдинда жуда кўп қийинчиликлар ва машаққатли меҳнат кутаётганини биламиз.
Бизнинг умумий амбициямиз аниқ — “Манчестер Юнайтед”ни Англия, Европа ва жаҳон футболининг энг юқори поғонасидаги ўрнига қайтариш”, - деди Ратклифф.
Акцияларнинг тўртдан бир қисми билан “Манчестер Юнайтед” тақдирини ўзгартириш мумкинми?
Reuters маълумотларига кўра, Глейзерлар оиласи “Red football LTD” орқали (ҳозирча) “Manchester United Plc” футбол клуби акцияларининг 96 фоизини назорат қилади, қолган 4 фоизи миноритар акциядорларга тегишли ёки очиқдир.
Британия жамоат компанияси реестри Глейзерлар ҳали ҳам клуб акцияларнинг 75% дан ортиғига эга эканлигини тасдиқлади.
Бундан келиб чиқадики якуний қарорни барибир ака-укалар чиқаришади, футболга оид масалалар эса бундан мустасно...
Ратклифф “Манчестер Юнайтед”ни бутунлай сотиб олса бўладими?
Ҳа, лекин бу ерда кичик муаммо бор - очкўз ва ҳар дақиқада қарорини ўзгартирадиган Глейзерлар! Молиявий эксперт Ден Плумлининг фикрича, Ратклиффнинг “Манчестер Юнайтед”ни тўлиқ назорат қилиш бўйича узоқ муддатли режаси бор, у “Юнайтед”нинг нархини 7 миллиард фунт стерлинггача кўтармоқчи.
Музокаралар нега узоққа чўзилди?
Бундай транзакцияни амалга ошириш учун Премьер-лига, Футбол Ассоциацияси ва Британия Молиявий назорати қўмитасининг розилиги талаб қилинади.
Мисол учун, “Нюкасл”ни Саудия инвестиция фондига сотиш бўйича музокара бир йилга чўзилди. Дастлаб Премер-лига келишувга тўсқинлик қилди ва у бир қатор шартлар (масалан, Қатарнинг Bein Sports телеканалига нисбатан суд тақиқининг бекор қилиниши) ва Саудия Арабистонининг клуб ишларига аралашмаслик кафолатларидан сўнггина “яшил чироқ”ни ёқди.
“Челси”ни америкалик Тодд Боули бошчилигидаги консорциумга сотиш бўйича музокара Роман Абрамовичга қарши санкциялар қўлланилганлиги туфайли бир неча ойда ҳал бўлди.
Ратклиффда эса молиявий назорат билан боғлиқ муаммолар бўлмаган. Аммо Глейзерлар билан келишувнинг “нозик” қисми эҳтимол, кўп вақт талаб қилган.
“Манчестер Юнайтед”нинг келажагини Глейзерларсиз кўриш мумкинми?
Шубҳасиз, “Манчестер Юнайтед”ни янги давр кутмоқда. “Юнайтед”нинг ҳозирги эгаларининг олиб бораётган сиёсати узоқ вақтдан бери мухлисларга ёқмасди ва улар буни бир-неча бор очиқ ойдин айтишган. Лекин шундай бўлишига қарамасдан ака-укалар ўзларининг ахмоқона сиёсатларидан воз кечишгани йўқ.
Мана масалан 2022 йили клубнинг қарзи 507,3 миллион фунтни ташкил қилишига қарамасдан, “очкўз” Глейзерлар ва бошқа акциядорларга 33,6 миллион фунт стерлинг дивидендлар тўланган.
Шундан билса бўладики ака-укаларга жамоанинг нуфузи эмас, балки ундан келаётган жарақ-жарақ миллионлар қизиқ.
Қисқа ва лўнда қилиб айтадиган бўлсак, “Манчестер Юнайтед”нинг янги акциядори: футбол ишларини шахсан ўз зиммасига олади, “Олд Траффорд”ни реконструкция қилади ва “Глейзерлар”ни “кетига” тепади.
Аброр Эшонхонов тайёрлади
