title

Ijtimoiy tarmoq faoli, bloger Emine-Lemara Mirzaahmedova 7 yilu 6 oyga ozodlikdan mahrum qilindi. Bu haqda Oliy sud Jamoatchilik bilan aloqalar markazi rahbari Aziz Abidov maʼlum qildi.

Xabarda aytilishicha, jinoyat ishlari boʻyicha Zangiota tuman sudining 2023-yil 12-oktyabrdagi hukmiga muvofiq Lemara Mirzaahmedova (1976-yilda Toshkent viloyatida tugʻilgan, oilali, 2 nafar farzandi bor, bloger, muqaddam sudlanmagan) Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “a”, “b” bandlari va 3-qismida nazarda tutilgan jinoyatlarni sodir etganlikda aybli deb topilib, Jinoyat-protsessual kodeksining 463-moddasi (ayblov hukmi chiqarish asoslari) 3-qismi 2-bandiga asosan javobgarlikdan ozod qilindi.

Shuningdek, L. Mirzaahmedova Jinoyat kodeksining 139-moddasi (tuhmat) 3-qismi “a”, “g” bandlari, 140-moddasi (haqorat qilish) 2-qismi va 165-moddasi (tovlamachilik) 3-qismi “a” bandida nazarda tutilgan jinoyatlarni sodir etganlikda aybdor deb topilib, unga Jinoyat kodeksining 57-moddasi (yengilroq jazo tayinlash) qoʻllanilib, 59 (bir necha jinoyat sodir etganlik uchun jazo tayinlash), 61 (jazolarni qoʻshishning hisoblash qoidalari) moddalari tartibida 7 yil 6 oy muddatga ozodlikdan mahrum qilish jazosi tayinlangan.

“Mirzaahmedova va uning himoyachilari tomonidan apellyatsiya tartibida berilgan shikoyatlar koʻrib chiqilib, Toshkent viloyat sudi jinoyat ishlari boʻyicha sudlov hayʼati apellyatsiya instansiyasining 2023-yil 13-dekabrdagi ajrimi bilan birinchi instansiya sudining hukmi oʻzgarishsiz va shikoyatlar qanoatlantirilmasdan qoldirildi”, — deyiladi xabarda.