“Namoyishlar oʻtkazish tartibi borligini endi eshitishim” — Kusherbayev

Deputat bloger Olimjon Haydarovga qoʻyilgan ayblovlarga nisbatan eʼtiroz bildirdi.

Xabaringiz bor, bloger Olimjon Haydarov maʼmuriy javobgarlik toʻgʻrisidagi kodeksning 201-moddasi (yigʻilishlar, mitinglar, koʻcha yurishlari yoki namoyishlar uyushtirish, oʻtkazish tartibini buzish) 1-qismi va 202-2-moddasi (yolgʻon axborot tarqatish) 2-qismida nazarda tutilgan maʼmuriy huquqbuzarliklarni sodir etgan deb topilib, mazkur kodeksning 34-moddasi (bir necha huquqbuzarlikni sodir etganlik uchun maʼmuriy jazo qoʻllash) tartibida bazaviy hisoblash miqdorining 70 baravari (21 000 000 soʻm) miqdorida jarima solindi.

Oliy Majlis Qonunchilik palatasi deputati sudning qaroriga eʼtiroz bildirib, namoyishlar uyushtirish tartibini qidirib topa olmaganini aytdi.

“Shu kunga qadar “yigʻilishlar, mitinglar, koʻcha yurishlari yoki namoyishlar uyushtirish, oʻtkazish tartibi”ni koʻrmadim ham oʻqimadim ham. Qidirib ham topolmayapman.

Ichki ishlar vazirligi masʼullaridan ham soʻradim, yoʻq ekan. Suddan iltimos qilamiz: boshqalar ham tartibni buzib qoʻymasligi uchun oʻsha oʻzlariga maʼlum “yigʻilishlar, mitinglar, koʻcha yurishlari yoki namoyishlar uyushtirish, oʻtkazish tartibi”ni bizlarga ham maʼlum qilib, tushuntirib berishsin.

Agarki tartibni buzgan, deb topibdimi, demak bu tartib sudga maʼlum. Shu bois, Oliy suddan javob kutamiz”, — deb yozdi deputat oʻzining Telegram kanalida.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг