“Mintaqaviy strategiyaning imzolanishi yangi kelajak sari tashlangan muhim qadam” — Ziroat Mirziyoyeva

Mazkur forum bolalar va yoshlarning iqlim oʻzgarishi salbiy oqibatlariga qarshi kurashishdagi oʻrnini, shu jumladan ekologik taʼlimni ilgari surish orqali eʼtirof etishga bagʻishlangan.

Toshkentda “Bolalar va yoshlar harakatda — Markaziy Osiyoda iqlim oʻzgarishi” xalqaro forumi boʻlib oʻtdi.

Forum ochilishida “Zamin” fondi Vasiylik kengashi raisi Ziroat Mirziyoyeva yosh ekofaollarga murojaat qildi:

“Forumning bosh ishtirokchilari — sizlar. Bugun bu yerda sizlarning toza, sogʻlom va barqaror muhit uchun kurashdagi yetakchiligingizni eʼtirof etish maqsadida yigʻildik.

Qoʻshnilarimiz bilan birgalikda Samarqand ekologik oromgohi yakunlari boʻyicha ishlab chiqilgan Barqaror rivojlanish madaniyatini ilgari surish hamda yoshlar va bolalarni iqlim kun tartibiga jalb qilish boʻyicha mintaqaviy strategiyaning imzolanishi yangi kelajak sari tashlangan muhim qadam boʻladi”, - dedi u.

Uzluksiz “yashil” taʼlim va ekologik madaniyatni shakllantirish orqali yoshlar salohiyatini mustahkamlash masalasi YUNEP ijrochi direktori Inger Andersen soʻzining muhim mavzusi boʻldi:

“Ekologik taʼlim ulkan ahamiyatga ega. U kelajak avlodlarga shunchaki norozilik vakillari boʻlish emas, balki oʻzgarishlarning drayveriga aylanish uchun zarur koʻnikma va bilimlarni beradi. Niyatimiz — keyingi avlodlar sayyora bilan uygʻun hayot kechirishning yangi va yaxshiroq usullarini orzu qiladigan dadil hukumat yetakchilari, olim va novatorlar boʻlsin”.

YUNISEFʻning Yevropa va Markaziy Osiyo mamlakatlari boʻyicha mintaqaviy direktori Regina De Dominitsis ham shunday dedi:

“Iqlim oʻzgarishi va ekologik taʼlim masalalarining maktab dasturlariga kiritilishi bolalar va yoshlarning oʻzgarib borayotgan iqlimga moslashish koʻnikmalaridan xabardorligini oshirishda muhim qadamdir”.

Forum ishtirokchilari ekotaʼlim mavzusini muhokama qilar ekanlar, oʻquv jarayonida yangi axborot texnologiyalaridan foydalanish muhim ekanini qayd etdi.

Markaziy Osiyo ekofaollari iqlim oʻzgarishiga qarshi kurash boʻyicha siyosat va dasturlarni ishlab chiqishda, koʻrilayotgan choralarni monitoring qilish va ularning borishini baholashda bolalarning ham ishtirok etish huquqi borligini alohida taʼkidladilar.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг