title

Toshkent viloyati Angren shahrida istiqomat qiluvchi fuqaro Azizbek Abdukarimov Haj safariga yuborish tizimidagi kamchiliklarda shikoyat qilmoqda. Fuqaroning soʻzlariga koʻra, uning ota-onasi 2017-yil topshirilgan arizaga koʻra, 18 – 19-oʻrinlarda boʻlishgan. Biroq oradan ikki yilcha oʻtib, roʻyxat aks harakat qilib, 21 – 22-oʻrinlarga tushib qolishgan.

Joriy yilning 14-yanvar kuni esa ular tekshirishga borishganda, roʻyxat umuman yoʻqotilib ketganiga guvoh boʻlishgan.

“Ota-onamni Hajga borishga roʻyxatga qoʻygan edik, lekin...” deya soʻz boshlagan murojaatchi.

“Men Abdukarimov Azizbek, Toshkent viloyati Angren shahrida yashayman. 2017-yil yaxshi niyat qilib, ota-onamni Hajga borishga roʻyxatga qoʻygan edik. Shu vaqtda 18-19 oʻrinda edilar. Oradan chamasi 2 yillar oʻtib, tekshirishga borsak 21-22 oʻringa tushib qolipmiz. Roʻyxatga orada kimlarnidir qoʻshib yuborishgan.

2022-yil 14-yanvar kuni yana bordik tekshirishga. Qizigʻi endi roʻyxatga olish daftari yoʻq, umuman topa olishmadi ham. 2020-yil bilan yangi daftar tutishibdi. Ichida umuman hyech nima yoʻq, yangidek turipti. Eski roʻyxat daftarni soʻrasak “men bilmayman, yangi kelganman”, deb iddao qilmoqda Mustaqillik mahallasi raisi Furqat ismli shaxs.

Ota-onam salkam 5 yildan beri roʻyxatda turib umuman oldinga siljimagani mantiqqa toʻgʻri kelmaydi. Sababi roʻyxatda bizdan oldinda boʻlgan 1-2 fuqaroni shaxsan oʻzimiz bilamiz” – deya shu masalada yordam berilishini soʻramoqda Azizbek Abdukarimov.

Mazkur ish yuzasida Din ishlari qoʻmitasi hamda Toshkent viloyati hokimligi tomonidan rasmiy izoh soʻrab, masalaga qonuniy baho berishlarini soʻrab qolamiz.