title

Qozogʻiston Majlisida “Qozogʻiston Respublikasi va Oʻzbekiston Respublikasi oʻrtasida ozodlikdan mahrum qilish jazosiga hukm qilingan shaxslarni jazoni oʻtash uchun berish toʻgʻrisidagi shartnomani ratifikatsiya qilish haqida”gi qonun loyihasi koʻrib chiqildi.

Bosh prokuror oʻrinbosari Aset Chindaliyev soʻzlariga koʻra, Qozogʻiston va Oʻzbekiston oʻrtasida mahkumlarni topshirish boʻyicha kelishuv gumanitar ahamiyatga ega.

“Bu choralar birinchi navbatda insonparvarlik xarakteriga ega. Koʻp hollarda boshqa davlatda jazo oʻtayotganlar mahalliy aholining tili va urf-odatlarini bilmaydi.

Odamlar bilan muloqot murakkablashadi, chunki atrof-muhit boshqacha. Qarindosh-urugʻ va doʻstlardan uzoqda. Bunday odamni jamiyatga moslashtirish unchalik oson emas”, — dedi Chindaliyev.

Bosh prokuror oʻrinbosari soʻzlariga koʻra, vataniga qaytish uchun avvalo mahkumning oʻzi rozi boʻlishi kerak.

“Shartnoma shartlariga kelsak, mahkumni boshqa joyga oʻtkazish uchun birinchi navbatda uning roziligi kerak - shaxs oʻz mamlakatida jazoni oʻtash niyati haqida ariza berishi kerak”, - deb qoʻshimcha qildi u.

Uning taʼkidlashicha, mahkumni ekstraditsiya qilish uchun qoʻyiladigan talablar bir qancha.

“Birinchi navbatda u fuqarolikka ega boʻlishi, qilmishi har ikki davlatda ham jinoyat hisoblanishi, jazoni oʻtash muddati kamida bir yil boʻlishi kerak. Shuningdek, bunga har ikki davlat ham rozilik berishi kerak.

Agar uning topshirilishi mamlakat suvereniteti va xavfsizligiga putur yetkazsa, bu milliy qonunchilikka zid boʻlsa va shaxsga nisbatan sud yoki tergov jarayoni davom etayotgan boʻlsa yoki uning moliyaviy qarzlari boʻlsa, mahkumlar ekstraditsiya qilinmaydi”, deb xulosa qildi u.

Qozogʻiston Bosh prokuraturasi maʼlumotlariga koʻra, Qozogʻistonda sudlangan 225 nafar Oʻzbekiston fuqarosi oʻz mamlakatida jazoni oʻtash istagini bildirgan. Shu bilan birga, Oʻzbekistonda sudlangan 20 nafar qozogʻistonlik bor.