So`ngi yangiliklar
Storitelling va mutolaaning inson rivojidagi oʻrni...
Parlamentda Nukus voqealari bo‘yicha tuzilgan komissiya axboroti tinglandi
Navoiyga Mongoliyadan 1000 boshga yaqin Bayat zotiga mansub qo‘ylar olib kelindi
Faollar aytayotgan “iqtidor” egasi oddiy “Virtual valyutachi” boʻlgan...
Rustam Minnixanov boshchiligidagi Tatariston delegatsiyasi Navoiy viloyatiga tashrif buyurdi
Tojikistonning Konibodomida yana to‘rt kishining jasadlari topildi. Mahalliy aholi vahimada
Tahlil qilingan davlat xaridlarida «Davlat xaridlari to‘g‘risida»gi qonunning tegishli modda talablari buzilganlik holatlari aniqlandi
Ichki audit xizmati xodimlarining faoliyati samaradorligini baholash tartibi belgilandi
Shavkat Mirziyoyev singapurlik tadbirkorlarni Oʻzbekistonga taklif qildi
Prezidentning 2023-yildagi ilk tashrifini Singapurdan boshladi. Uning tashrifi davomida qiymati 5 milliard dollarlik shartnoma imzolangan.
17-yanvar kunining ikkinchi yarmida Prezident Shavkat Mirziyoyev Singapurga davlat tashrifi doirasida jahonning yetakchi oliy taʼlim muassasalaridan biri boʻlgan Singapur milliy universiteti huzuridagi Li Kuan Yu nomidagi Davlat siyosati maktabiga tashrif buyurdi.
Maʼlum boʻlishicha, Singapurning birinchi Bosh vaziri va ushbu mamlakat “iqtisodiy moʻjizasi” muallifi Li Kuan Yu sharafiga nomlangan maktab davlat siyosati va xalqaro munosabatlar sohasida magistratura dasturlari asosida kadrlar tayyorlashga, ilmiy va siyosiy tadqiqotlar oʻtkazishga ixtisoslashgan.
Qator yillar davomida maktab oliy taʼlim muassasalarining xalqaro reytinglarida yetakchi oʻrinlarni egallab kelmoqda. Bu yerda xorijiy mamlakatlarning yuqori darajadagi mansabdor shaxslarini oʻqitish uchun qisqa muddatli dasturlar ham tashkil etilgan.
Maʼlumki, Singapur erishgan iqtisodiy va ijtimoiy muvaffaqiyatlarda chuqur oʻylangan kadrlar siyosati, malakali, masʼuliyatni his etgan va halol rahbar kadrlarni tayyorlashga ustuvor eʼtibor muhim oʻrin tutgan. Davlat yetakchisi ham oʻz faoliyatining boshidanoq ushbu masalalarga alohida eʼtibor qaratib keladi.
Shu maʼnoda, Singapurning davlat xizmatchilarini tayyorlash sohasidagi tajribasini oʻrganish va qoʻllash katta ahamiyatga ega. Davlat rahbari maktab faoliyati bilan batafsil tanishib, oʻquv muassasasi rahbariyati bilan ikki tomonlama hamkorlik istiqbollarini muhokama qildi.
Oʻzbekiston Prezidenti huzurida Oʻzbekiston Davlat boshqaruvi akademiyasi va Li Kuan Yu nomidagi Davlat siyosati maktabi oʻrtasida hamkorlik toʻgʻrisida bitim imzolash marosimi boʻldi. Soʻng Prezident Singapurning yetakchi kompaniya va tashkilotlari rahbarlari bilan uchrashuv oʻtkazdi.
Tadbirda Singapur mehnat vaziri – savdo va sanoat ikkinchi vaziri Leng Si Tang, Singapur biznes federatsiyasi raisi Ming Yan Lim, ushbu mamlakatning Indorama, Meinhardt group, CPG Corporation, Changi Airports, Singapur menedjmentni rivojlantirish instituti, TMC Academy, Virtus Health kabi 15 ta yirik kompaniyalari rahbarlari ishtirok etdi.
Prezident Shavkat Mirziyoyev uchrashuv ishtirokchilarini qutlab, uning yangi 2023-yildagi ilk tashrifi aynan Singapurga boʻlayotgani Oʻzbekistonning ushbu mamlakat bilan mustahkam va oʻzaro manfaatli munosabatlarni yoʻlga qoʻyishga alohida eʼtiboridan dalolat ekaniga eʼtibor qaratdi.
Oʻzbekistondagi tizimli islohotlar tufayli investitsiyalar hajmi YAIMning 30 foizidan ortiq darajaga yetdi. 2022-yilning oʻzida Oʻzbekiston iqtisodiyotiga 8 milliard dollar toʻgʻridan-toʻgʻri xorijiy investitsiyalar jalb qilindi.
Kuni kecha oʻtgan Oʻzbekiston-Singapur biznes forumining natijalari mamnuniyat bilan qayd etildi: uning doirasida umumiy qiymati qariyb 5 milliard dollarlik yangi investitsiya, savdo va moliyaviy kelishuvlar imzolandi.
“Bu hamkorligimiz ancha faollashganidan, muvaffaqiyatli kechayotganidan, Oʻzbekiston-Singapur munosabatlari amaliy va sifatli mazmun bilan boyiganidan dalolat beradi”, — dedi Prezident.
Lekin sheriklik salohiyati hali toʻliq ishga solinmagan. Prezident Shavkat Mirziyoyev taʼkidlaganidek, mamlakatlarimiz ikki tomonlama hamkorlikni yanada kengaytirishga qodir.
“Singapur kompaniyalarining ilgʻor tajribasi bizda katta qiziqish uygʻotmoqda. Ishonchim komilki, singapurlik hamkorlarning innovatsiya va texnologiyalari Oʻzbekistonning resurslari va kadrlar salohiyatiga qoʻshilsa, boʻlajak qoʻshma loyihalar barqaror rivojlanadi”, — deydi Prezident.
Oʻzbekiston yetakchisi uzoq muddatli va oʻzaro manfaatli hamkorlik uchun eng istiqbolli yoʻnalishlarni koʻrsatib oʻtdi. Singapur kompaniyalarining Oʻzbekistondagi xususiylashtirish jarayonlarida ishtiroki, shahar va transport infratuzilmasini rivojlantirish, kimyo va toʻqimachilik, “yashil” iqtisodiyot, taʼlim, sogʻliqni saqlash va boshqa yoʻnalishlardagi qoʻshma loyihalarni amalga oshirish shular jumlasidan.
Oʻzbekiston Singapur tadbirkorlarini zarur ishlab chiqarish infratuzilmasi bilan taʼminlash, imtiyozlar va kafolatli xaridlar shaklida keng qoʻllab-quvvatlash, boshqa koʻmak choralarini taqdim etishga tayyor ekani bildirildi.
Oʻzbekistondagi islohotlar xorijiy hamkorlar orasida Oʻzbekistonning ishonchli va barqaror sherik sifatidagi mavqeini mustahkamlashga qaratilganini taʼkidlab, Prezident Shavkat Mirziyoyev singapurlik ishbilarmonlarni oʻzaro manfaatli hamkorlik uchun ochilayotgan imkoniyatlardan foydalanish va iqtisodiyotimizga faol investitsiya kiritishga chaqirdi.
Sheriklikni kengaytirish yuzasidan batafsil fikr almashildi. Singapur biznesi vakillari oʻz chiqishlarida Oʻzbekistonda amalga oshirilayotgan iqtisodiy islohotlarni yuksak baholadi, mamlakatimizda amalga oshirilishi rejalashtirilgan aniq loyihalarini taqdimot qildi.
Ishbilarmonlar delegatsiyasining har bir aʼzosi bilan suhbatlashib, Shavkat Mirziyoyev tadbirkorlarni yaratilgan qulay investitsiya muhiti bilan shaxsan tanishish uchun Oʻzbekistonga taklif qildi.
Uchrashuv yakunida Oʻzbekiston tomoni mutasaddilariga tadbirda aytilgan barcha loyihalarni, ularni amalga oshirishning bosqichma-bosqich mexanizmlarini, aniq muddat va ijrochilarini kiritgan holda tegishli Amaliy chora-tadbirlar rejasini ishlab chiqish va tasdiqlash topshirildi.
Shu bilan Oʻzbekiston Respublikasi Prezidenti Shavkat Mirziyoyevning Singapurga samarali davlat tashrifi yakuniga yetdi. “Changi” xalqaro aeroportida oliy martabali mehmonni Singapurning rasmiy shaxslari kuzatib qoʻydi. Mirziyoyev Toshkentga joʻnab ketdi.
