title

Сизлар билан анжуманда учрашиб турганимдан хурсандман. Таъкидлаб ўтганимиздек, конференциямиз Академиянинг 30 йиллигига бағишланган. Ўқув даргоҳимизнинг шонли тарихи ўтган асрнинг 30 йилларидан бошланади. Ўша даврларда Ўзбекистоннинг йирик шаҳарлари бўлган Самарқанд ва Қўқонда милиция мактаблари фаолият юритган.

1932 йил ушбу муассасалар бирлаштирилиб, Тошкент ўрта махсус милиция мактаби ташкил қилинган. 1967 йилда Тошкентда олий милиция мактаби ҳам ташкил қилиниб, офицер кадрларни тайёрлаш йўлга қўйилган. Мактабда Ўзбекистон билан бир қаторда, Туркманистон, Тожикистон, Қозоғистон ва Қирғизистон Республикалари ички ишлар тузилмалари учун ҳам кадрлар тайёрланган.

Мазкур ўқув масканлари Ўзбекистон мустақилликка эришган давргача фаолият кўрсатди. 1994 йил 2 сентябрда Тошкент ўрта махсус ва олий милиция мактаблари негизида Ички ишлар вазирлиги академияси ташкил қилинди.

Ўтган йиллар мобайнида ўқув даргоҳида таълимнинг самарали ёндашувлари жорий қилинди. Масканда ҳуқуқни муҳофаза қилувчи органлари учун кадрлар тайёрлаш, уларни қайта тайёрлаш ва малакасини оширишнинг яхлит тизими йўлга қўйилди.

2016 йилдан бошлаб Ўзбекистон ўз тараққиётининг янги даврига қадам қўйди. Муҳтарам Президентимиз, Қуролли Кучлар олий бош қўмондони Шавкат Мирзиёев раҳбарлигида барча соҳалар, шу жумладан, ички ишлар органлари тизими ҳам тубдан ислоҳ қилинди.

Соҳанинг фаолият мазмунини бутунлай ўзгартириш, ички ишлар органларини аҳоли билан бевосита яқиндан ишлайдиган, халқ манфаатларига хизмат қиладиган халқчил тузилмага айлантириш, соҳа учун малакали кадрлар тайёрлаш устувор мақсад этиб белгиланди.

Бу борада давлат раҳбари Шавкат Мирзиёевнинг 2017 йил 29 июнь куни Ички ишлар вазирлиги академиясига ташрифи, том маънода, тарихий аҳамият касб этди. Мазкур ташрифдан сўнг ўқув даргоҳининг нуфузи ва мақомини ошириш, моддий-техника базасини мустаҳкамлашга алоҳида эътибор қаратилди.

Натижада, академия мамлакатимиз ҳуқуқни муҳофаза қилувчи органларини етук ва малакали кадрлар билан таъминлаб келаётган етакчи олий таълим муассасаларидан бирига айланди.

Кейинги йилларда Академия фаолиятида мутлақо янги давр бошланди. Бу борада муҳтарам Президентимизнинг 2021 йил 15 апрелдаги «Ички ишлар органлари учун профессионал кадрларни тайёрлашнинг сифат жиҳатидан янги тизимини жорий этиш бўйича чора-тадбирлар тўғрисида»ги қарори долзарб аҳамият касб этди.

Мазкур қарор билан академияда бакалавриат ва магистратурани ўз ичига олувчи икки босқичли олий таълим тизими жорий қилинди. Кундузги таълим бакалавриатида модулли ўқитиш тизими йўлга қўйилиб, машғулотларнинг 60 фоизи назария, қолган 40 фоизи амалиётга йўналтирилди.

Курсантларнинг ихтисослик йўналишлари бўйича амалий кўникмаларини бойитиш мақсадида базавий амалиёт машғулотлари жорий қилиниб, машғулотларни пойтахтнинг Юнусобод, Яшнобод ва Мирзо Улуғбек туманлари ички ишлар органлари ҳамда маҳалла ҳуқуқ-тартибот масканларида ўтказиш йўлга қўйилди.

Жойлардаги криминоген вазиятни чуқур ўрганиш орқали курсантларда зарур касбий кўникмаларни ҳосил қилиш мақсадида ҳудудий ички ишлар органлари раҳбарлари томонидан онлайн мастер-класс машғулотларини ўтказиш татбиқ қилинди.

Ўқув тезкор-тергов гуруҳлари ташкил қилиниб, курсантларнинг Тошкент шаҳрида содир этилган жиноятлар бўйича ҳодиса жойига чиқиб, терговга қадар текширув ҳаракатларини ўрганиши йўлга қўйилди.

Таълим мазмунини бойитиш мақсадида ихтисослик кафедралари бошлиқларининг Ички ишлар вазирлиги соҳавий хизматлари ҳисобот йиғилишларида бевосита иштирок этиши жорий қилинди.

Бугунги кунда маъруза машғулотларига тажрибали амалиётчи ходимларнинг жалб қилинаётгани, суд органлари билан ташкил қилинаётган сайёр суд мажлислари, ички ишлар органлари фахрийлари ва кўп йиллик амалий тажрибага эга ходимлар иштирокида ўтказилаётган мулоқот учрашувлари, «Кичик финал», «Финал» комплекс ўқув машғулотлари, битирувчи курс аълочи курсантларининг ҳудудий ички ишлар органларида стажёр ходим сифатида кунлик амалиётга чиқаётгани курсантларнинг назарий билимларини амалий кўникмалар ёрдамида бойитишга хизмат қилмоқда.

Академия магистратураси ички ишлар органларининг асосий фаолият йўналишларини самарали бошқаришга қодир универсал раҳбар кадрларни тайёрлашга йўналтирилган.

Магистратурада дастлаб «ташкилий-тактик бошқарув» ва «ташкилий-стратегик бошқарув» мутахассисликлари, жорий йилдан бошлаб эса «илмий-педагогик фаолият» ихтисослиги бўйича кадрларни тайёрлаш йўлга қўйилди.

Таълимни замон талаблари даражасида ташкил этиш мақсадида машғулотларга энг тажрибали профессор-ўқитувчилар билан бир қаторда, ички ишлар вазири ўринбосарлари, вазирлик соҳавий хизматлари раҳбарлари, шунингдек, Олий Мажлис Қонунчилик палатаси депутатлари ва Сенати аъзолари, давлат ҳокимияти ва бошқарув органлари вакиллари, маҳаллий ва хорижий етакчи таълим муассасаларининг олим ҳамда экспертлари кенг жалб қилиб келинмоқда.

Бундан ташқари, тингловчиларнинг Ўзбекистон Республикаси Президенти ҳузуридаги Давлат бошқарув академиясида раҳбарлик маҳоратини ошириши, хорижий давлатларга бориб илғор тажрибаларни ўрганиши кенг татбиқ қилинган.

Ўқув даргоҳимизда илмий салоҳият кўрсаткичларини оширишнинг стратегик йўналишлари белгилаб олинган бўлиб, 2022–2026 йилларга мўлжалланган илмий-тадқиқот дастури қабул қилинган.

Олий таълимдан кейинги таълим факультетида таянч докторантура, докторантура ва мустақил изланувчилик йўналишлари фаолият юритмоқда. Диссертация мавзуларини шакллантиришда ҳудудий ички ишлар органлари фаолиятидаги муаммоларни тадқиқ қилиш ва уларнинг натижаларини амалиётга кенг жорий қилишга алоҳида эътибор қаратилмоқда.

Ҳуқуқбузарликларнинг сабаб ва шарт-шароитларини ўрганиш академия фаолиятининг устувор йўналишларидан бири саналади.

Кейинги йилларда Ички ишлар органлари фаолиятини услубий таъминлаш маркази ташкил қилиниб, жойлардаги ички ишлар органлари билан ҳамкорлик янада мустаҳкамланди. Марказ зиммасига нафақат жиноятчиликни жиловлаш бўйича ҳудудлар тажрибасини яратиш, балки ички ишлар органлари ходимларининг касбий билим ва малакасини ошириш, жойларда маҳалла тизими вакиллари учун долзарб йўналишларда сайёр машғулотлар ташкил этиш, аҳолининг ҳуқуқий онги ва маданиятини юксалтиришга қаратилган тарғиботлар ўтказиш вазифалари юкланди.

Мазкур йўналишдаги ишларни такомиллаштириш мақсадида янги тизим жорий қилинди. Ихтисослик ва юридик кафедралар Қорақалпоғистон Республикаси, вилоятлар ва Тошкент шаҳридан иборат 14 та маъмурий ҳудудга бириктирилди. Кафедралар томонидан ҳудудларнинг криминоген вазиятини ўрганиш, мавжуд муаммолар юзасидан ички ишлар органларига методик ёрдам кўрсатиш, академияни тамомлаган ёш ходимлар фаолиятини мунтазам равишда мониторинг қилиб бориш йўлга қўйилган.

Ўтган қисқа вақт ичида тажрибали профессор-ўқитувчилар томонидан ҳар бир ҳудуднинг ўзига хос хусусиятларини инобатга олган ҳолда 70 дан ортиқ методик қўлланмалар яратилиб, амалиётга жорий қилинди. Айни пайтда криминоген вазияти мураккаб ҳудудларни «илмий диагноз» асосида ўрганиш натижасида ишлаб чиқилаётган таклиф ва тавсиялар жиноятчиликни жиловлашга хизмат қилмоқда.

Ҳозирги глобаллашув даврида ривожланган давлатларнинг илғор ёндашув ва тажрибаларини ўрганиш тобора долзарб аҳамият касб этмоқда. Ўқув даргоҳида айни йўналишда ҳам салмоқли ишлар амалга оширилмоқда.

Сўнгги уч йилда Туркия, Россия, Жанубий Корея, Ҳиндистон, Беларусь, Тожикистон ва бошқа давлатларнинг 15 дан ортиқ турдош олий таълим муассасалари билан ҳамкорлик меморандумлари имзоланди. Натижада, ўқув даргоҳи билан ҳамкорликни йўлга қўйган халқаро ташкилотлар 9 тага етган бўлса, турдош хорижий таълим муассасалари 30 тадан ошди.

Истиқболда халқаро алоқаларни янада кенгайтириш, АҚШ, Франция, Япония, Қатар, Сингапур, Саудия Арабистони, Бирлашган Араб Амирликлари ва бошқа давлатларнинг энг илғор таълим муассасалари билан манфаатли ҳамкорликни йўлга қўйиш режалаштирилган.

Мазкур йўналишдаги ислоҳотлар ҳақида тўхталганда, академия ҳузуридаги Ўқув-методик кенгаш фаолиятини ҳам айтиб ўтиш жоиз. Етакчи хорижий олий таълим ташкилотларининг юқори малакали мутахассисларидан иборат мазкур кенгашдан мақсад таълим жараёнига илғор хорижий тажрибалар ва инновацион педагогик технологияларни кенг татбиқ этишдан иборат.

Ислоҳотлар даврида таълим сифати ва самарадорлигини ошириш мақсадида янгича мезонлар татбиқ қилинди. Профессор-ўқитувчилар фаолиятини баҳолашнинг «Смарт рейтинг» электрон тизими жорий этилди.

Соҳа вакилларининг педагогик маҳорати ва малакасини мунтазам равишда ошириб боришга қаратилган узлуксиз тизим йўлга қўйилди. Ихтисослашган кафедралар профессор-ўқитувчиларининг соҳавий хизматларда амалиёт ўташи белгиланди. Таълим сифатини назорат ва мониторинг қилиш марказини ташкил этиш орқали ўқув жараёни самарадорлиги оширилди.

Кейинги йилларда академиянинг моддий-техника базаси тубдан такомиллаштирилди. Ўқув бинолари капитал таъмирдан чиқарилиб, замонавий жиҳозлар билан таъминланди. Криминалистик лабораториялар ташкил қилингани муносабати билан хатшунослик ва ҳужжатларнинг техник-криминалистик экспертизасини ўтказишга мўлжалланган махсус воситалар олиб келинди. Шу билан бирга, ўқув даргоҳи ҳудудида яна бир йирик лойиҳа – Хитой Халқ Республикаси ҳукуматининг беғараз кўмаги асосида Инновацион таълим фондининг қурилиш ишлари бошлаб юборилди.

Бугунги кунда Ички ишлар вазирлиги академияси илғор тажрибаларни ўзида мужассам этган, мамлакатимиз ва жаҳонда ўз ўрнига эга бўлган, ҳуқуқни муҳофаза қилувчи органлар учун янги авлод кадрларини етиштириб берадиган нуфузли таълим масканига айланиб бормоқда.

Таълим жараёнига татбиқ қилинаётган янгиланишлар соҳа учун интеллектуал салоҳияти ва профессионал билим даражаси юқори, маънавий-ахлоқий жиҳатдан етук, она Ватанимиз ва халқимиз тақдирига юксак дахлдор кадрларни тайёрлашга хизмат қилмоқда.

Бугунги конференция ўқув даргоҳимизнинг 30 йиллик фаолиятини сарҳисоб қилиш билан бирга, таълим соҳасини ривожлантиришда манфаатли алоқаларни кенгайтириш ҳамда глобал ҳамкорлик муҳитини яратишда муҳим аҳамият касб этиши шубҳасиз.

Рустам Ҳатамов