title

Бекобод шаҳар 5-сонли мактаб ўқитувчиси Д.Б 8-синф ўқувчисига доимий равишда босим ўтказгани туфайли, ўқувчи ўз жонига қасд қилишга уринган. Бу ҳақда ўқувчининг онаси Мактабгача ва мактаб таълими вазири Ҳилола Умаровага қилган мурожаатида маълум қилди.

Ўзбекистон инсон ҳуқуқлари “Эзгулик” жамияти келтирган маълумотларга кўра, Д.Б томонидан ўқувчиларни ижтимоий ҳолатига қараб айрича муносабат қилиш, камбағал оила болаларига руҳий ва жисмоний босим ўтказиши, мактаб коллективи орасида гуруҳбозлик вужудга келтириб, эътироз билдирган кишиларга нисбатан турли усуллар билан таҳдидлар қилиши айтилган.

“Д.Б билан учрашганимда улар менга “менинг орқамда 50 та ота-она бор, бу мактабда мен эмас, сени боланг ўқимайди. Сени бу мактабдан кетказаман. Ота-оналар йиғилишига кел, сени болангни шармандаларча ҳайдайман” деб, менга айтдилар.

Шундан сўнг, ХТБ ва прокуратурага бориб, бўлган воқеани тушунтирдим. Улар мен билан биргаликда йиғилишга боришларини айтишди. Қизим мактабдан тушкун аҳволда келиб, тинмай йиғлади.

Мен ундан нима бўлди деб сўрадим, у “Сиз кетганингиздан кейин ҳар дарсда кириб, Д.Б куракда турмайдиган сўзлар билан ҳақорат қилиб, чиқиб кетди. Мен бу гаплардан кейин қандай мактабга бораман? Ота-онанг жинни ёки ногирон бўлса, биз айбдор эмасмиз.

Бу мактабда сен ҳам ўқияпсан, йиғинларга пул беролмаса биз айбдор эмасмиз. Ҳамма беряпти, битта сени онанг бермайди. Ўзингни ҳам тарбиянг йўқ, йигитларинг бор, сен шармандасан” деб ҳақорат қилганини айтди”, — дейди ўқувчи қизнинг онаси.

Энг ёмони она қизи кўп миқдорда дори ичиб, ўз жонига қасд қилишган уринганини, бундан ташқари уксус ичиб турган вақтида қайтариб қолинганини маълум қилган.

Жабрдийда қизнинг онаси ушбу мурожаатга Мактабгача ва мактаб таълими вазири Ҳилола Умаровадан эътибор қаратишини сўради.