EFFECT.UZ – ҲАҚИҚАТ УЧУН!
Сўнгги янгиликлар
"Негатив"и бўлмаган, камбағалликдан чиққан афсона ёҳуд Марсело ҳақида...

"Негатив"и бўлмаган, камбағалликдан чиққан афсона ёҳуд Марсело ҳақида...

Марсело Виеира да Силва Жуниор 1988 йил 12 май куни Рио-де-Жанейро шаҳрида туғилган. Марсело футзал билан 9 ёшида шуғуллана бошлаган, 13 ёшида Бразилия футболи гигантларидан бири “Флуминенсе” клубининг ёшлар жамоасига бориб, ярим ҳимоячи сифатида тўп сурган. Кейинчалик, “Флуминенсе”нинг янги мураббий Марселони тезлигидан яхшироқ фойдаланиш учун тўлиқ орқада ишлата бошлади.

Марсело камбағал оилада яшаган, ота-онаси мунтазам равишда унинг машғулот базасига кунлик автобус қатновини ҳам таъминлай олмас эди, шунинг учун Марсело деярли футбол ўйнашни тўхтатган. Аммо клуб умидли футболчини йўқотмаслик учун бу харажатларни ўз зиммасига олган.

“Флуминенсе”да ўтказган икки мавсумда Марсело 38та ўйинда майдонга тушган. Европа клублари футболчига эътибор беришни бошлади: “18 ёшга тўлганимда, баъзи Европа клублари менга қизиқиш билдиришди. ЦСКА ва “Севилья” мени қўлга киритмоқчи бўлишган”, деган эди Марсело.

Марсело юқорида айтиб ўтганимиздек, фаолиятини ярим ҳимоячи сифатида бошлаган. 2007 йилда унга “Реал Мадрид” скаутлари қизиқиб қолади ва улар тез орада унинг оиласига Испанияга кўчиб ўтишни таклиф қилишди ҳамда уларнинг Европа қитъасига жойлашишига ёрдам беришади.

“Реал Мадрид” билан Марсело кўплаб совринларни қўлга киритди, жумладан, олти марта Ла Лига ва беш марта УЕФА Чемпионлар Лигасида ғолиб чиқди. Кўп йиллар давомида бразилиялик Мадрид клубининг асосий ўйинчиларидан бири бўлди.

Марсело 2006-2018 йилларда Бразилия терма жамоасида ҳам ўйнаган. 2008 йилда Пекин Олимпиадасида бронза, 2012 йилда Лондонда бўлиб ўтган Олимпия ўйинларида кумуш медалларни қўлга киритди. У 2013 йилда Конфедерациялар кубогини ҳам қўлга киритган.

“Реал Мадрид” — Афсонага айланиш

“Флуминенсе”га янги мураббий тайинлангандан кейин Марсело чап қанот ҳимоясига ўтказилган. Натижада ёш ҳимоячи тезда “Реал Мадрид” селекционерларининг эътиборини тортган. Шундан сўнг Марсело “Реал” билан 2007 йилнинг январида 2013 йилгача шартнома имзолаган.

Битим 7 миллион еврони ташкил қилди. Марсело тезда янги жамоага мослашди, чунки ўша пайтда унинг ҳамюртлари “Реал”да ўйнашган. Айниқса, унга мослашишда Роберто Карлос ёрдам берди, у ўз тажрибасини ёш Марсело билан ўртоқлашди. 2006/07 йилги мавсумда Марсело 6та ўйин ўтказди ва мавсум якунида жамоа билан Испания чемпионлигини қўлга киритди.

Кейинги мавсумда “Реал Мадрид”ни янги мураббий - Бернд Шустер бошқарди. Унинг қўл остида Марсело “Реал”нинг асосий таркибидан жой олишга муваффақ бўлди. 2011 йил 26 июлда Марсело Испания фуқаролигини олди ва шундан бери у легионер ҳисобланмайдиган бўлди.

2014 йилнинг 18 январида Испания чемпионати доирасидаги “Бетис”га қарши ўйинда Марсело “Реал” сафидаги 250-учрашувини ўтказди, учрашув мадридликларнинг 5:0 ҳисобидаги ғалабаси билан якунланди.

2017 йилнинг 18 апрелида у “Реал Мадрид” сафидаги 300-учрашувини ўтказди. 2019 йил бошида матбуотда Марселонинг жамоани тарк этиш нияти ҳақида миш-мишлар тарқалганди, аммо якунда у “қаймоқранглилар” таркибида ўйнашда давом этди. Марсело 2022 йилда Чемпионлар лигасида ғалаба қозонгач, у Мадрид клубини тарк этишини эълон қилди.

Марселонинг терма жамоадаги фаолияти

Кўп йиллар давомида Бразилия терма жамоасининг асосий чап қанот ҳимоячиси бўлган Роберто Карлос терма жамоа сафида 125 та ўйин ўтказган (терма жамоа тарихида иккинчи ўрин). У 2006 йилги Жаҳон чемпионатидан сўнг 33 ёшида терма жамоадаги фаолиятини якунлади ва ўша йили “Флуминенсе”да тўп сураётган 18 ёшли чап қанот ҳимоячиси Марсело терма жамоадаги дебют учрашувини ўтказди.

Бу 2006 йил 5 сентябрда Лондондаги Уайт Харт Лейн стадионида Уэлсга қарши ўртоқлик ўйинида содир бўлди. Терма жамоа сафидаги илк ўйинда Марсело гол уришга муваффақ бўлди, бразилияликлар 2:0 ҳисобида ғалаба қозонишди.

2008 йилда Марсело Пекин Олимпиадаси учун Бразилия олимпия терма жамоасига чақирилди. Бразилия терма жамоаси курашни “С” гуруҳида бошлади. Бразилияликлар билан биргаликда гуруҳдан Хитой, Бельгия ва Янги Зеландия терма жамоалари ўрин олди. Бразилия яхши натижалар кўрсатиб, учта ўйинда ҳам ғалаба қозонди ва улар бирорта ҳам гол ўтказиб юбормади.

Чорак финалда бразилияликлар Камерунни қўшимча дақиқаларда 2:0 ҳисобида мағлуб этишди, Марсело 105-дақиқада иккинчи голни урган. Ярим финалда Бразилия терма жамоаси Аргентина терма жамоасидан мағлуб бўлди (0:3), учинчи ўрин учун ўйинда эса турнирда иккинчи бор бельгияликларни мағлуб этишди (3:0).

2010 йилнинг май ойида Марсело ЖАРда бўлиб ўтган 2010 йилги Жаҳон чемпионатида захирадан ўрин олган 7 нафар футболчи қаторига киритилган. Жанубий Африкадаги турнирда миллий терма жамоанинг чап қанотидаги асосий ўйинчи Мишел Бастос бўлди.

2000 йиллар охирида ўзининг юқори даражадаги ўйини билан танилган, одатда ярим ҳимоячи ва ҳатто ҳужумкор ярим ҳимоячи позициясида ўйнаган Мишел Бастос “Лион” футболчиси эди. Жанубий Африкада бразилияликлар чорак финалда Голландия термасига имкониятни бой беришди.

2011 йилнинг октябрь ойида Марсело терма жамоадаги иккинчи голини урди, у Мексикага қарши ўртоқлик учрашувида (2:1) содир бўлди.

2012 йилда Марсело яна Лондон Олимпиадаси учун Бразилия терма жамоасига киритилди. Бразилияликлар ўз гуруҳидаги учта ўйинда ҳам ғалаба қозонишди, кейин плей-оффда Гондурас ва Корея Республикаси жамоаларини мағлуб этишди. Аммо Уэмблидаги финалда улар кутилмаганда мексикаликларга мағлуб бўлишди. Марсело турнирдаги барча: 6та ўйинда майдонга тушди.

Марсело 2013 йилги Конфедерациялар кубогида терма жамоанинг асосий ўйинчиси бўлган. Унда бразилияликлар финалда Испанияни мағлуб этишган.

2014 йилги ЖЧда Марсело Хорватияга қарши ўйинда ўз дарвозасига гол уриб қўйган. Бу Бразилия терма жамоасининг Жаҳон чемпионати тарихидаги илк автоголи бўлган.

Ярим финалда Германия терма жамоасидан 1:7 ҳисобида йирик мағлубиятга учраганига қарамай, Марсело ФИФА томонидан Жаҳон чемпионатининг рамзий терма жамоасига киритилди. У бунга Бразилия терма жамоасининг яна икки ҳимоячиси - Тиаго Силва ва Давид Луиз билан бирга кирди. Бразилияликлар Голландияга мағлуб бўлган (0:3) учинчи ўрин учун ўйинда Марсело иштирок этмади.

Россияда бўлиб ўтган ЖЧ-2018да Марсело терма жамоанинг асосий чап қанот ҳимоячиси эди. Швейцарияга қарши биринчи ўйинда жамоа сардори бўлган бўлса, турнирнинг бошқа ўйинларида Тиаго Силва ва Миранда сардорлик боғичини тақиб юришган.

Сербияга қарши гуруҳ босқичидаги учинчи ўйинда Марсело жароҳат олди ва унинг ўрнига 10-дақиқадаёқ Филипе Луис майдонга тушди. У Мексикага қарши (2-0) 1/8 финал учрашувини ўтказиб юборди, аммо чорак финалда Бельгияга қарши ўйинда тўлиқ 90 дақиқа ўйнади. Якунда бразилияликлар Бельгиядан 2:1 ҳисобида мағлуб бўлди.

Марсело яна жамоадошлари Тиаго Силва ва Филипе Коутино билан бирга турнирнинг рамзий терма жамоасига киритилди. Ушбу Жаҳон чемпионати Марсело учун охиргиси бўлди. Чунки афсонавий футболчи бошқа Бразилия терма жамоасига чақирилмади.

Кўриб турганингиздек, Марсело фаолияти давомида кўплаб совринларни қўлга киритган ва ФИФА томонидан бир неча бор йил терма жамоасидан ўрин олган. Юқорида айтиб ўтганимиздек, Марсело “Реал Мадрид” сафида Чемпионлар лигасида 5 маротаба зафар қучган.

Маълумот учун, Марсело “Реал Мадрид” ва “Флуминенсе” сафида умумий 579 ўйинда иштирок этган ва 44 гол уришга эришган. Бразилия терма жамоасида эса умумий 58 ўйинда майдонга тушиб, 6 гол уришга муваффақ бўлган.

Эслатиб ўтамиз, Марсело куни кеча Грециянинг “Олимпиакос” жамоасига эркин агент сифатида бориб қўшилди. Бироқ, Марселога кўплаб бир қатор грант клублар ҳам қизиқиш билдирган эди. Лекин бразилиялик футболчи Топ-5 чемпионат клубларининг таклифларини қабул қилмади.

 

«Улашинг»

  • Смайлы и люди
    Животные и природа
    Еда и напитки
    Активность
    Путешествия и места
    Предметы
    Символы
    Флаги
Кликните на изображение чтобы обновить код, если он неразборчив

RATING