Uzbekistan Airways’нинг Истанбул ваколатхонасı ҳодимларининг маълумотига кўра, давом этаётган қийин об-ҳаво шароитини ҳисобга олган ҳолда Истанбул аэропорти фақат фавқулодда рейсларни қабул қилмоқда. Бу ҳақда Ўзбекистон Республикасининг Истанбул шаҳридаги Бош консулхонаси хабар бермоқда.

“Шу муносабат билан 26 январь куни “Ўзбекистон ҳаво йўллари” Миллий авиакомпанияси Тошкент-Истанбул-Тошкент йўналиши бўйича HY271/272 ва Фарғона-Истанбул-Фарғона йўналиши бўйича HY277/278 рейсларини бекор қилишга мажбур бўлди”, дейилади Бош консулхона маълумотида.

Бекор қилинган парвозлар йўловчилари чиптанинг тўлиқ қийматини сотиб олинган жойда қайтариш ёки 27 январь кунига ёки парвозлар қайта тикланганидан кейин ҳар қандай кунга бепул кўчириш ҳуқуқига эгадирлар.  

Эслатиб ўтамиз, аввалроқ Тошкент халқаро аэропорти самолётларни қабул қилиш учун ёпилган эди. Бунга шаҳарни қоплаган қалин туман эди сабаб бўлган.

Қайд этилишича, Нукус-Тошкент йўналиши бўйича учиши керак бўлган HY16 рейси сўнгги манзил аэропортида кўриш имконияти ёмонлиги сабаб Навоий вилоятидаги муқобил аэродромга жўнаб кетган.

Бешта самолёт экипажлари парвоз қилишга қарор қилган. Хусусан, Тошкентдан қуйидаги рейслар амалга оширилди:

HY16 303 - Тошкент - Тел-Авив,

КC 128d - Тошкент - Олмаота,

HY 3601 - Тошкент - Москва,

HY 3631 - Тошкент - Санкт-Петербург,

HY 9687 - Тошкент - Краснодар.