«Ҳайфсан», прокурор текшируви ва бозор раҳбарининг «учиши» — Қосимов Шўрчида бўлди

Танқидий руҳда ўтган йиғилишда вилоят раҳбари Шўрчида тартиб ўрната олмаган масъулларни аяб ўтирмади.

Сурхондарё вилояти ҳокими Улуғбек Қосимов юқори турувчи органларга Шўрчи туманида бир нечта масъулларнинг фаолиятини ўрганиб чиқиб, уларга нисбатан қонуний чора кўришни сўради. Бу ҳақда вилоят ҳокимлиги матбуот хизмати хабар бермоқда.  

Ҳокимлик матбуот хизматининг эслатишича, Қосимов 18 январь куни Шўрчи туманига ташрифи давомида қурилиш ишлари, бозордаги ҳолатлар танқид қилиниб, туманда вилоят ҳокимининг ўринбосари раҳбарлигида штаб тузиш, 10 кун муддатда ишларни сифатли ташкил этиш, туман деҳқон ва буюм бозорларини тартибга келтириш бўйича топшириқлар белгилаб берган.

Бугун Шўрчи туманида ушбу штаб томонидан амалга оширилган ишлар, вилоятда қурилиш соҳасидаги муаммолар соҳа масъуллари ва йирик қурилиш ташкилотлари вакиллари иштирокида муҳокама қилинди. 

Қосимов Шўрчи тумани деҳқон бозоридаги камчиликларни бартараф этиш чорасини кўрмаганлиги, ўз лавозим мажбуриятларига совуққонлик билан қараганлиги учун бозор раҳбари вазифасидан озод этилди ва туман прокуроридан бозор масъуллари фаолиятини ўрганиб чиқиб, қонуний баҳо беришни сўради.

Белгилаб берилган топшириқлар ижросига “панжа” ортидан қараб, ўз вазифасига совуққонлик билан ёндошганлиги учун туман СЭС, Тоза ҳудуд ДУК, Электр тармоқлари корхонаси, 94-сонли оилавий поликлиника раҳбарлари ҳамда 65-сонли мактаб директори фаолиятини ўрганиб, лавозимига лойиқлик масаласини кўриб чиқиш бўйича юқори турувчи органларига топшириқлар берилди.

Шўрчи туманида қурилиш соҳасидаги ишларни назоратга олмаганлиги ва сифатли амалга оширилишини таъминламаганлиги учун туман ҳокимининг қурилиш соҳасига масъул ўринбосарига “ҳайфсан” интизомий жазоси берилди.

Шунингдек, ўрганишлар мобайнида вилоятда олиб борилаётган айрим қурилиш ишлари талаб даражасида эмаслиги, пудратчи ташкилотлар томонидан сифатсиз, арзон ва аҳолининг ҳақли эътирозларига сабаб бўлаётган қурилиш материалларидан фойдаланилаётганлиги танқид қилинди.

Вилоят ҳокими, шаҳар ва туманлар ҳокимлари ҳамда қурилиш соҳаси масъулларига аниқланган муаммо ва камчиликларни бартараф этиш, уй-жойлар қурилишини жадаллаштириш, турар-жойлар қурилиши режалаштирилган майдонларни аукцион савдоларига чиқариш, аҳолини ичимлик суви, электр энергияси таъминотини яхшилаш бўйича қабул қилинган дастурлар ижросини таъминлаш, йўллар қурилиши ва таъмирланиши ҳамда ижтимоий соҳа объектлари қурилишини сифатли амалга ошириш бўйича тегишли вазифаларни белгилаб берди.

Танқидий руҳда ўтган йиғилишдан сўнг, тадбиркорлар томонидан ишлаб чиқарилаётган қурилиш материаллари кўргазмаси билан ҳам танишди.

“Effect.uz”ни “Telegram”да кузатинг

“Effect.uz”ни “Facebook”да кузатинг

“Effect.uz”ни “YouTube”да кузатинг

Effect.uz'ни Инстаграмда кузатинг