So`ngi yangiliklar
Navoiyga Mongoliyadan 1000 boshga yaqin Bayat zotiga mansub qo‘ylar olib kelindi
Faollar aytayotgan “iqtidor” egasi oddiy “Virtual valyutachi” boʻlgan...
Rustam Minnixanov boshchiligidagi Tatariston delegatsiyasi Navoiy viloyatiga tashrif buyurdi
Tojikistonning Konibodomida yana to‘rt kishining jasadlari topildi. Mahalliy aholi vahimada
Tahlil qilingan davlat xaridlarida «Davlat xaridlari to‘g‘risida»gi qonunning tegishli modda talablari buzilganlik holatlari aniqlandi
Ichki audit xizmati xodimlarining faoliyati samaradorligini baholash tartibi belgilandi
Bugun havo yanada sovishi kutilmoqda
Media mahsulotlarini “ma’naviy ekspertiza”dan o‘tkazishni joriy etish to‘g‘risidagi qaror bekor qilindi
Prezident shifokorlarni kasb bayrami bilan tabrikladi
Bugun, 11-noyabr Sogʻliqni saqlash xodimlari kuni shu munosabat bilan Oʻzbekiston prezidenti Shavkat Mirziyoyev sohada faoliyat yuritayotgan shifokor va hamshiralarga tabrik yoʻlladi.
Qadrli tibbiyot xodimlari!
Avvalo, oʻz hayotini inson salomatligini asrashdek olijanob ishga bagʻishlab kelayotgan siz azizlar – fidoyi shifokor va hamshiralarni, soha faxriylarini kasb bayramingiz bilan chin qalbimdan muborakbod etaman.
Barchamiz yaxshi tushunamizki, el-yurt salomatligi – jamiyatning bebaho boyligidir. Tinchlik va sogʻliq boʻlgan joyda albatta oʻsish va oʻzgarish, baxtli va farovon hayot boʻladi.
Shu maʼnoda, Yangi Oʻzbekistonimiz erishayotgan katta yutuqlarda, inson kapitalini rivojlantirishda jonkuyar tibbiyot xodimlarining munosib hissasini eʼtirof etib, ularga har qancha rahmatlar aytsak, arziydi.
Aziz doʻstlar!
Keyingi yillarda amalga oshirayotgan keng koʻlamli islohotlarimiz tufayli sogʻliqni saqlash tizimida ham tub oʻzgarishlar yuz bermoqda.
Avvalo, ajratilayotgan byudjet mablagʻlarining bir necha bor koʻpaytirilgani, xususiy sektor rivojiga keng yoʻl ochilayotgani tufayli sohaning moddiy-texnik bazasi va kadrlar salohiyati mustahkamlanmoqda, xizmatlar tarmogʻi kengayib, sogʻlom raqobat muhiti shakllanib, sifat va samaradorlik oshmoqda. Diagnostika va davolash amaliyotiga ilgʻor zamonaviy texnologiyalar faol joriy etilmoqda.
Barcha ijtimoiy xizmatlar qatori tibbiyotni ham xalqimizga yanada yaqin qilish uchun malakali davolash va profilaktika tizimini xonadonlargacha olib kirish choralari koʻrilmoqda.
Shu maqsadda birlamchi tibbiy-sanitariya muassasalari faoliyati yangilanmoqda. Ushbu boʻgʻinda birinchi navbatda kasalliklarning oldini oladigan, ularni keltirib chiqaradigan sabablarga qarshi kurashadigan mexanizmlarni joriy etish boshlangani ham shundan dalolatdir.
Aholining ehtiyojmand qatlamlariga yuqori malakali tibbiy yordam koʻrsatishni mahallabay, manzilli va aniq maqsad asosida taʼminlash boʻyicha yangicha tajriba qoʻllanmoqda. Tizimda “Elektron poliklinika”, “Elektron retsept” dasturlari joriy etilmoqda. Buning uchun patronaj xodimlari xalqaro standartlar asosida oʻqitilmoqda.
Tez tibbiy yordam tizimi avtomatlashtirilgan elektron boshqaruvga oʻtkazilib, xorijda ishlab chiqarilgan 1 000 ta maxsus zamonaviy avtomobil bilan taʼminlandi.
Ixtisoslashgan tibbiy xizmat ham aholiga yaqinlashtirilmoqda. Bu yoʻnalishda diagnostika usullari 500 dan, davolash usullari esa 800 dan oshgani eʼtiborlidir.
Respublika ixtisoslashtirilgan gematologiya ilmiy-amaliy tibbiyot markazida donordan olingan suyak koʻmigi oʻzak hujayralari transplantatsiyasi, Kardiologiya markazida murakkab endoskopik jarrohlik amaliyoti yoʻlga qoʻyildi.
Milliy tibbiyot markazi shifokorlari tomonidan olis tumanlarda Yevropadan keltirilgan koʻchma kardiojarrohlik majmuasida murakkab operatsiyalar muvaffaqiyatli oʻtkazilmoqda.
Azim poytaxtimizda tibbiyot sohasidagi noyob mega loyiha sifatida barpo etilgan Respublika ixtisoslashtirilgan onkologiya va radiologiya markazining yangi zamonaviy majmuasida soʻnggi namunadagi asbob-uskuna va sharoitlar asosida kasalliklarni barvaqt aniqlash va davolash hajmi bir necha barobar oshadi. Eng muhimi, yurtdoshlarimiz ortiqcha vaqt va mablagʻ sarflab, chet eldagi davolash markazlariga borish tashvishidan qutuladi.
Hech shubhasiz, tibbiyot sohasidagi yutuqlarimiz xalqaro miqyosda eʼtirof etilayotgani barchamizni quvontiradi. Bolalar milliy tibbiyot markazi xalqaro sertifikatni qoʻlga kiritgani, Xirurgiya markazida xalqaro sifat standartlari joriy etilgani, mamlakatimiz gepatit V ga qarshi kurashishda mintaqaviy maqsadli koʻrsatkichlarga erishgani tasdiqlangani shular jumlasidandir.
Albatta, barchamizning birgalikdagi mehnatimiz mahsuli boʻlgan bunday misollarni yana koʻplab keltirish mumkin.
Yaqinda davlat tibbiy sugʻurta mexanizmlarini joriy etishga oid qaror imzolandi. Ushbu hujjatga koʻra, tizim doirasidagi bepul tibbiy xizmatlar va dori-darmonlar xarajatlari davlat byudjetiga toʻlanayotgan soliqlar hisobidan qoplanishi belgilandi.
Aholi salomatligiga eʼtiborni kuchaytirish orqali inson qadrini oshirish, uning hayotiy manfaatlarini taʼminlashga qaratilgan bunday muhim ishlarni kelgusida ham izchil davom ettiramiz.
Muxtasar aytganda, tibbiyotni yanada xalqchil sohaga aylantirish, odamlarni ushbu tizimdan rozi qilish masalasi doimo eʼtiborimiz markazida boʻladi.
Bu boradagi vazifalarni muvaffaqiyatli ado etishda muqaddas qasamyodiga sodiq siz, zahmatkash va olijanob tibbiyot xodimlari oʻzingizni ayamasdan, boy bilim, mahorat va tajribangizni safarbar etasiz, deb ishonaman.
Buyuk Ibn Sino bobomiz anʼanalarining munosib davomchilari boʻlgan siz, azizlarni Tibbiyot xodimlari kuni bilan yana bir bor chin dildan qutlab, barchangizga mustahkam sogʻliq, oilaviy baxt, sharafli faoliyatingizda yangi yutuqlar tilayman.
Shavkat Mirziyoyev,
Oʻzbekiston Respublikasi Prezidenti
