Тумандаги ер билан боғлиқ яна бир катта можаро кенг жамоатчилик муҳокамасига сабаб бўлмоқда. Гап суғориладиган ер майдонининг шубҳали тарзда тадбиркорлик субъектига ўтказилиши, кейин эса у ерда кўп қаватли турар жой мажмуаси қурилиши ҳақида кетмоқда.
Бу воқеа нафақат ер масаласи, балки юзлаб фуқароларнинг маблағи, суд қарорлари ва эҳтимолий фирибгарлик ҳолатлари билан ҳам боғлиқ экани айтилмоқда.
Маълум қилинишича, низо Тошкент туманининг Чоштепа маҳалласидаги суғориладиган ер майдони атрофида юзага келган. Фуқаро Омон Агзамовнинг айтишича, ушбу можаро 2021 йилдан буён давом этиб келмоқда.
Иш ҳужжатларига кўра, Тошкент тумани ҳокимлигининг 2019 йил 14 октябрдаги қарори билан мазкур ер майдони «Ихтиёр Барака Файз» номли фермер хўжалигига ажратилган. Бироқ кейинчалик расмий базалар текширилганда, бундай номдаги фермер хўжалиги амалда мавжуд бўлмагани аниқланган.
Энг қизиқ жиҳатлардан бири — корхона номи турли ҳужжатларда ҳар хил ёзилгани. Айрим ҳужжатларда «Ихтиёр Барака», бошқаларида эса «Иҳтиёр Барака» деб кўрсатилган. Юридик нуқтаи назардан эса битта ҳарфдаги фарқ ҳам ҳужжат ҳақиқийлигига жиддий таъсир қилиши мумкин.
Мурожаатчига кўра, судлар томонидан ҳокимлик қарорининг айрим бандларини расмийлаштириш рад этилган бўлса-да, кадастр органлари ерни давлат рўйхатидан ўтказиб берган. Кейин эса суғориладиган ер майдони қонунчиликда белгиланган тартибда захирага қайтарилмасдан, тўғридан-тўғри МЧЖ балансига ўтказилгани айтилмоқда. Энг катта баҳс эса ердан мақсадли фойдаланиш масаласида юзага келган.
Ҳужжатларда бу ҳудудда хизмат кўрсатиш шохобчаси қурилиши белгиланган бўлсада, амалда у ерда 10 қаватли улкан турар жой мажмуаси қад ростлаган. Айтилишича, ҳозиргача қарийб 500 нафар фуқаро ушбу уйлардан хонадон сотиб олиш учун маблағ тўлаб улгурган.
Бундан ташқари, ерни расмийлаштириб бериш ваъдаси билан икки нафар шахс катта миқдордаги маблағни фирибгарлик йўли билан ўзлаштириб кетгани ҳам иддао қилинмоқда. Ушбу ҳолат бўйича Бош прокуратура томонидан жиноят иши қўзғатилгани, аммо тергов ҳозирча якунига етмагани айтилган.
Мазкур вазиятни ўрганиш мақсадида Effect.uz ижодий жамоаси Тошкент тумани ҳокимлигида бўлиб, туман раҳбари билан учрашув ўтказган. Учрашув давомида ҳокимлик «Ихтиёр Барака Файз»нинг фермер хўжалигидан МЧЖга ўтиш жараёни ва Вазирлар Маҳкамаси баёни қонунийлигини архив ҳужжатлари асосида қайта текширишини билдирган.
Шунингдек, текширув натижалари бўйича фуқаро ва оммавий ахборот воситаларига расмий жавоб берилиши маълум қилинган. Туман ҳокими ҳудудда мутлақо ҳужжатсиз ёки рухсатсиз қурилган кўп қаватли уйлар йўқлигини ҳам таъкидлаган. Унинг сўзларига кўра, қурилиш жараёнлари бир нечта назорат органлари томонидан текширилади ва айрим ҳолатларда тадбиркорлар лойиҳадан четга чиқиб қўшимча қават ёки терасса қуриши мумкин. Бироқ бу ҳолат қурилиш бутунлай ноқонуний дегани эмаслиги қайд этилган. Шу билан бирга, ҳоким Кимё-технология институти учун ажратилгани айтилган 65 гектар ер майдони бўйича ҳам муносабат билдирган.
Маълум қилинишича, мазкур ҳудуд фақат лойиҳалаштириш учун кўрсатилган бўлиб, якуний ажратиш қарори чиқмаган. Ҳозирда эса ушбу ҳудуд «Яшил макон» лойиҳаси доирасида дендрология парки сифатида шакллантирилаётгани айтилган.
Учрашув якунида туман ҳокими мазкур масала шахсий назоратга олинганини ва ҳокимлик ОАВ ҳамда фуқаролар билан очиқ мулоқотга тайёрлигини билдирган.
Айни пайтда юзлаб фуқаролар маблағи тикилган ушбу можаро бўйича жамоатчилик якуний ҳуқуқий хулосаларни кутиб қолмоқда.
