Ёшлар ижод саройида Ўзбекистон Миллий Иқтисодий Ҳамкорлик Ассоциацияси (ЎзМИҲУ) ҳузуридаги Халқаро бизнес-клуб ТУРОН расман фаолиятини бошлади.
Очилиш маросимида дипломатик корпус, халқаро ташкилотлар ва давлат органлари вакиллари, йирик тадбиркорлар ҳамда хорижий делегациялар иштирок этди. Бир залда Ўзбекистон ва яқин хориж мамлакатларидан келган, қурилиш, ишлаб чиқариш, қишлоқ хўжалиги, ахборот технологиялари, молия, логистика, туризм, тўқимачилик ва бошқа соҳаларда фаолият юритаётган тадбиркорлар жам бўлди.
Тадбир ЎзМИҲУ раиси Фаррух Фахриддин ўғли Фазлиевнинг мурожаати билан бошланди. Ундан сўнг таклиф этилган фикр етакчилари — Расул Кушербаев, Аброр Мухторалий ва Мухаммадали Эшонқулов сўзга чиқди.
Клуб консепсиясини ўз тақдимотида Халқаро бизнес-клуб ТУРОН президенти, тадбиркор Илхом Бегимқулов баён этди. У клуб фаолияти инвестиция, экспорт ва импортга қаратилганини алоҳида таъкидлади. Клуб аъзолари қуйидаги имкониятларга эга бўлади:
инвестицияга тайёрлаш ва инвестиция жалб қилишга кўмаклашиш;
экспорт эҳтиёжларини аниқлаш ва кўргазмаларда қатнашиш;
хорижий ҳамкорлар билан онлайн ва офлайн учрашувлар ташкил этиш;
импортёрларни ишлаб чиқарувчилар ва етказиб берувчилар билан боғлаш;
бизнесни янги бозорларга олиб чиқиш;
ҳуқуқий масалалар бўйича юридик маслаҳат бериш ва шартномаларни ҳуқуқий экспертизадан ўтказиш.
Халқаро бизнес-клуб ТУРОН олдига қўйилган мақсад аниқ: Ўзбекистон бизнесини масштаблаш орқали янги босқичга олиб чиқиш. Шу тариқа клуб экспорт географиясини кенгайтириш ва хорижий инвестицияларни жалб қилишдек муҳим давлат вазифасини амалга оширишга хизмат қилади.
