Малайзиядан Тошкентга учиб келаётган самолётда маст ҳолда жанжал кўтариб, борт кузатувчилари ва йўловчиларни ҳақорат қилган Россия фуқароси 7 суткага маъмурий қамоққа олинди.
Суд ҳужжатига кўра, воқеа 2026-йил 5-ноябр куни ҲЙ-552 рейси орқали амалга оширилган «Куала-Лумпур — Тошкент» парвози давомида содир бўлган.
Маълум қилинишича, Россия фуқароси В.К. самолёт бортида маст ҳолда бақир-чақир қилиб, йўловчиларнинг тинчлигини бузган. У борт кузатувчисига қўпол муомалада бўлиб, уни ҳамда бошқа йўловчиларни ҳақорат қилган. Уни тинчлантиришга қаратилган уринишлар натижа бермаган.
Самолёт Тошкент халқаро аеропортига қўнгач, ички ишлар ходимлари йўловчидан самолётдан тушиб, ҳолат юзасидан тушунтириш бериш учун маъмурий бинога боришни сўраган. Бироқ у ходимларнинг қонуний талабларига бўйсунмаган. Ҳатто қўл юкини самолёт трапидан ерга улоқтириб, тепган.
Суд мажлисида В.К. айбига иқрор бўлган. У парвоз вақтида борт кузатувчисидан спиртли ичимлик сўраганини, бироқ мастлиги сабабли рад жавобини олганини билдирган. Шундан сўнг улар ўртасида тортишув келиб чиққан. Россия фуқароси қилмишидан пушаймонлигини айтган.
6-ноябр куни Жиноят ишлари бўйича Сергели туман суди В.К.ни Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси биринчи қисми (ички ишлар органлари ходимларининг қонуний талабларини бажармаслик) бўйича айбдор деб топган.
Суд қарорига кўра, унга майда безорилик учун 7 сутка маъмурий қамоқ, ички ишлар ходимларининг қонуний талабларини бажармаслик учун эса 440 минг сўм жарима тайинланган.
Жазоларни қўшиш натижасида россияликка узил-кесил 7 сутка маъмурий қамоқ жазоси белгиланган.
