Яшнобод туманига ҳоким этиб тайинланганига ҳали бир ой ҳам бўлмаган Абдулазиз Абдулҳаков фуқаролар қабулини ёритиш учун борган ЭФФЕЦТ.УЗ мухбири Даврон Холбоевга босим ўтказишга ҳаракат қилган.
Ҳодиса 6-ноябр куни Тарновбоши маҳалласида фуқаролар учун ташкил этилган сайёр қабул жараёнида содир бўлган.
Қабул жараёнида ҳоким журналистнинг хонадан чиқиб кетишини сўраган. Суҳбат давомида Абдулҳаков:
«Чиқиб кетмаса, ўтиравераман, сизлар ҳам ўтираверасизлар. Менга керак эмас ЭФФЕЦТ.УЗ (ОАВ). Чиқмасанг чиқма. Мени телефонинг билан қўрқитмагин, қўрқишдан кейин туғилганман, тушундингми?» — деган ва столга қўли билан урган.
Воқеадан кейин томонлар вазиятни муҳокама қилган. Ҳоким тушунмовчилик юзага келганини билдирган ва ЭФФЕЦТ.УЗ ходимидан ҳолатни тўғри тушунишни сўраган.
Шундан сўнг фуқаролар қабули давом эттирилган ва ЭФФЕЦТ.УЗ ижодий жамоасига жараённи ёритиш имконияти берилган.
ОАВнинг фуқаролар қабулида иштирок этиши
«Журналистлик фаолиятини ҳимоя қилиш тўғрисида»ги қонуннинг 5-моддасида журналистнинг касбий фаолиятини амалга оширишда давлат органларининг очиқ ҳайъат мажлислари ва оммавий тадбирларида иштирок этиш, ахборот тўплаш ва зарур ҳолларда уни техника воситалари орқали қайд этиш ҳуқуқлари белгиланган.
Шунингдек, журналист мансабдор шахс қабулида бўлиш ва касбий фаолиятига доир ахборот олиш ҳуқуқига эга.
Шу нуқтаи назардан, очиқ ўтказилаётган фуқаролар қабулини ёритиш учун келган ОАВ вакилининг иштирок этиши билан боғлиқ ҳар қандай чеклов ёки талаб қонунчиликда белгиланган тартиб ва асослар доирасида баҳоланиши лозим.
Ҳокимлик: «Тушунмовчиликка сабаб бўлган»
Яшнобод тумани ҳокимлиги мазкур ҳолат юзасидан муносабат билдириб, воқеага бошқача изоҳ берди.
Ҳокимлик маълум қилишича, ЭФФЕЦТ.УЗ журналисти мурожаатчининг ортидан эшикни тақиллатмасдан, шунингдек, унга ҳамроҳлик қилаётгани ва унинг манфаатларини ифода этаётгани ҳақида олдиндан маълум қилмасдан хонага кирган (бу каби ҳолат содир бўлмаган, исбоциз баёнот). Ҳокимликка кўра, айнан шу ҳолат журналистнинг қабулда иштирок этиши билан боғлиқ тушунмовчиликка сабаб бўлган.
Қайд этилишича, кейинчалик томонлар вазиятни муҳокама қилиб, ўзаро тушунишга эришган. Фуқаронинг мурожаатида кўтарилган масала ҳал этилган.
Шунингдек, журналист туман ҳокими билан суҳбатлашиб, интервю ҳам олгани ва учрашув конструктив руҳда якунлангани айтилмоқда. Яшнобод тумани ҳокимлиги ОАВ билан ҳамкорликка очиқ эканини ва конструктив мулоқотга тайёрлигини билдирган.
Ҳокимлик ўзаро ҳурмат, фуқаролар қабули тартибига риоя қилиш ҳамда воқеаларни тўлиқ ва холис ёритишни бундай ҳамкорликнинг муҳим асослари сифатида қайд этган.
Шу билан бирга, ҳокимлик жамоатчиликка фақат тушунмовчиликнинг ўзи эмас, балки учрашувнинг якуни ҳам етказилиши муҳимлигини таъкидлаган: фуқаронинг мурожаати ҳал этилган, ЭФФЕЦТ.УЗ ходимлари билан мулоқот эса давом эттирилган.
Маълумот учун: Абдулазиз Абдулҳаков 15-октябр куни Яшнобод тумани ҳокими лавозимига тайинланган. У бунга қадар Тошкент шаҳридаги УЕТ Цонструцтион МЧЖ ижтимоий обектларни қуриш департаменти директори лавозимида ишлаган.
