Тошкент шаҳрининг Миробод туманида ноқонуний онлайн қимор ўйинлари ва интернет фирибгарлиги билан шуғулланганликда гумонланаётган икки гуруҳ фаолиятига чек қўйилди. Тезкор тадбирларда жами 72 нафар шахс ушланди.
Биринчи гуруҳ Фарғона 1-тор кўчасидаги ойига 9 минг долларга ижарага олинган хонадонда фаолият юритган. У ерда 52 нафар шахс қўлга олинди. Дастлабки маълумотларга кўра, улар ноқонуний онлайн қимор ва букмекерлик ўйинлари учун пул қабул қилиш, маблағларни банк карталарига ўтказиш ҳамда пул ювиш билан шуғулланган.
Хонадондан 110 минг доллар нақд пул, 71 та ноутбук, 278 та телефон ва учта Старлинк қурилмаси ашёвий далил сифатида олинган.
Катта Миробод кўчасидаги иккинчи манзилда эса ойига 2 минг долларга ижарага олинган яширин колл-марказ аниқланган. У ерда 20 нафар шахс ушланган. ИИББ маълумотига кўра, улар сохта иш таклифлари орқали фойдаланувчилар ишончига кириб, пулларини алдов йўли билан қўлга киритишда гумонланмоқда.
Иккинчи манзилдан 24 та ноутбук, бир планшет, 52 та телефон ва тўртта Ви-Фи қурилмаси олинган.
Текширувда ҳар икки гуруҳда раҳбарлар, иш бошқарувчилар, операторлар ва қўриқчилардан иборат вазифалар тақсимоти мавжудлиги аниқланган. Шунингдек, улар фаолияти билан боғлиқ 576 минг долларлик криптоактивлар айланмаси фош этилган.
Ҳолат юзасидан Жиноят кодексининг 278⁸-моддаси 2-қисми билан жиноят иши қўзғатилиб, тергов ҳаракатлари олиб борилмоқда.
