Тошкент вилоятида Инстаграм ва Телеграм орқали арзон маҳсулотлар сотишни ваъда қилиб, харидорлардан олдиндан пул олганликда гумонланган 18 ёшли йигит қўлга олинди. У 11 та фирибгарлик ҳолатига алоқадор бўлиши мумкин.
ИИВ маълумотига кўра, Сирдарё вилоятида туғилган йигит сохта саҳифалар очиб, автомобил эҳтиёт қисмлари, аксессуарлар ҳамда Дубай ва Кореядан келтирилган телефонларни арзон нархларда таклиф қилган. Харидорлардан 300 минг сўмдан 2 миллион сўмгача олдиндан тўлов олиб, кейин улар билан алоқани узган.
Жумладан, Нурафшон шаҳрида яшовчи фуқаро автомобил эҳтиёт қисмлари учун 1 миллион 940 минг сўм ўтказган, бироқ буюртмасини олмаган.
Тезкор тадбир давомида гумонланувчининг 11 та фирибгарлик ҳолатига алоқадорлиги аниқланган. Жабрланувчиларга етказилган умумий зарар 10 миллион 645 минг сўмни ташкил этади.
Қайд этилишича, йигит аввал ҳам Жиноят кодексининг 168-моддаси билан бир неча бор судланган.
