Андижон вилоятида тадбиркорга ер ажратиш бўйича ҳоким қарори кейинчалик суд томонидан ҳақиқий эмас деб топилди. Оқибатда тадбиркорга етказилган 3,1 млрд сўмдан ортиқ зарарни қоплаш масаласи юзага келган.
Маълум қилинишича, Олтинкўл тумани ҳокимининг 2020-йил 16-июлдаги қарорлари асосида «А.Б.» МЧЖга «Топтик» МФЙ ҳудудидан 0,12 гектар ер ажратилган. Тадбиркор ушбу ерда савдо, маиший ва тиббий хизмат кўрсатишга мўлжалланган бинолар қуриб, кўчмас мулкка бўлган ҳуқуқини давлат рўйхатидан ўтказган.
Бироқ кейинчалик ер ажратишга оид ҳоким қарорлари маъмурий судлар томонидан ҳақиқий эмас деб топилган. Натижада тадбиркорга 3,1 млрд сўмдан ортиқ моддий зарар етказилган.
Тадбиркор манфаатларини ҳимоя қилишда амалий ёрдам сўраб Бизнес-омбудсманга мурожаат қилган. Омбудсман вакиллари суд жараёнида иштирок этиб, Фуқаролик кодексининг 15-моддасига асосланган ҳолда етказилган зарарни қоплаш бўйича ёзма фикр тақдим этган.
Якунда Андижон туманлараро иқтисодий суди қарори билан туман ҳокимлигидан тадбиркор фойдасига 3,1 млрд сўм зарар ундириш белгиланган.
