Тошкент халқаро аеропортида божхона назоратидан яшириб олиб киришга уринилган қарийб 691 грамм заргарлик буюмлари ушланди. Уларнинг дастлабки қиймати 1 миллиард 20 миллион 600 минг сўмга баҳоланган.
«Тошкент-АЕРО» ихтисослаштирилган божхона комплекси маълумотига кўра, сўнгги кунларда аеропортнинг чегара божхона пости ходимлари хориждан учиб келган йўловчилар билан боғлиқ бир нечта қоидабузарликни аниқлаган.
Хусусан, турли хорижий йўналишлардан келган йўловчиларнинг юклари ва ёнидан божхона назоратига белгиланган тартибда тақдим этилмаган, сариқ рангли металлдан ясалган заргарлик буюмлари топилган.
Дастлабки ҳисоб-китобларга кўра, аниқланган буюмларнинг умумий оғирлиги қарийб 691 грамм, қиймати эса 1 миллиард 20 миллион 600 минг сўмни ташкил этган.
Ҳозирда мазкур ҳолатлар юзасидан божхона текширувлари давом эттирилмоқда.
