Эффецт.уз таҳририятига «Марғилон сой» тўйхонасининг бошқа шахс номига расмийлаштирилиши ва келишилган маблағ тўланмагани юзасидан мурожаат келиб тушди. Мурожаатчи тўйхона тақдири билан боғлиқ ҳолатлар холис ўрганилишини сўрамоқда.
Мулкий низоларда ҳужжатларнинг расмийлаштирилиши билан бир қаторда, келишувнинг ҳақиқий мазмуни, тарафларнинг манфаатлари ва маблағларнинг амалда тўланган-тўланмагани ҳам муҳим аҳамиятга эга.
Эффецт.уз таҳририятига тақдим этилган мурожаатда «Марғилон сой» тўйхонасининг бир неча босқичда бошқа шахслар номига ўтказилиши ва ушбу жараёнда юзага келган ҳолатлар баён қилинган.
2018-йилдаги таклиф ва 2025-йилдаги келишув
Аризада келтирилишича, тўйхона дастлаб аёлнинг номида бўлган. Унинг турмуш ўртоғи 2016-йилда қамоқдан озод этилган.
Мурожаатчи маълумотларига кўра, 2018-йилда турмуш ўртоғи билан бирга жазо ўтаган таниши келиб, тўйхонани сотишни таклиф қилган. Бироқ ўша вақтда тўйхона сотилмаган.
2025-йилда эса мазкур таниш яна мурожаат қилган.
Аризада баён этилишича, у бошқа шахсдан 2,2 миллион АҚШ доллари миқдорида қарзи борлигини, бу муаммо ҳал этилмаса, қамоққа тушиб қолиши мумкинлигини айтган.
Мурожаатчи иддаосига кўра, айнан шу ҳолатдан фойдаланиб, тўйхонани 1,7 миллион АҚШ доллари эвазига расмийлаштиришга кўндирган.
Тўйхона бир шахсдан бошқасига ўтказилган
Мурожаатда келтирилган маълумотларга кўра, тўйхона эгаси мулкни турмуш ўртоғи номига ўтказган. Кейин эса турмуш ўртоғи тўйхонани мазкур танишнинг қарзи бўлган шахс номига расмийлаштириб берган.
Шу тариқа, тўйхона аввал мулк эгасининг турмуш ўртоғи номига, кейин эса бошқа шахс номига ўтказилгани айтилмоқда.
Мурожаатчи ушбу ҳаракатлар натижасида тўйхона ўз мулкидан айрилганини, бироқ келишилган 1,7 миллион АҚШ доллари маблағни на ўзи, на турмуш ўртоғи олганини билдирмоқда.
Бу ҳолатда олди-сотди ҳужжатлари, мулкни ўтказиш асослари ва тарафлар ўртасидаги келишувларнинг мазмуни алоҳида ўрганилиши талаб этилади.
130 минг доллар тўланган, аммо тўйхона эгаси пул олмаганини айтмоқда
Аризада тўйхона билан боғлиқ банк қарзи ва юридик хизмат харажатлари ҳам қайд этилган.
Мурожаатчи маълумотларига кўра:
120 минг АҚШ доллари — тўйхонага тегишли банк кредит қарзини тўлаш учун;
10 минг АҚШ доллари — юридик хизмат ҳақи учун.
Жами 130 минг АҚШ доллари мазкур таниш томонидан тўлангани билдирилган.
Бироқ мурожаатчи ушбу тўловлар тўйхона эгасига келишилган сотув маблағининг берилганини англатмаслигини таъкидламоқда.
Унинг фикрича, тўйхона бошқа шахс номига ўтказилган, кредит қарзи тўланган, аммо мулк эгаси ва унинг турмуш ўртоғи келишилган маблағни олмаган.
Мазкур ҳолатга аниқлик киритиш учун банк тўловлари, нотариал ҳужжатлар ва мулкнинг кейинги тақдирига оид маълумотларни ўрганиш зарур.
Мулк эгаси Тергов департаменти раҳбариятидан ёрдам кутмоқда
Мурожаатчи мазкур ҳолатлар юзасидан тергов жараёнига эътироз билдириб, ишнинг барча жиҳатлари холис ўрганилишини сўрамоқда.
Унинг асосий умиди Ички ишлар вазирлиги Тергов департаменти бошлиғи Рамазон Ашраповга қаратилган.
Мурожаатчи Тергов департаменти раҳбариятидан:
тўйхонанинг бошқа шахс номига ўтказилиши асосларини текшириш;
олди-сотди ҳужжатлари ва тўловлар ўртасидаги тафовутларга ойдинлик киритиш;
барча тарафларнинг ҳаракатларига қонуний баҳо бериш;
мулкий ҳуқуқларини ҳимоя қилиш масаласини кўриб чиқишни сўрамоқда.
Мурожаатчи учун бу масала шунчаки тўйхона олди-сотдиси эмас. Унинг фикрича, ишонч асосида амалга оширилган ҳаракатлар натижасида оила ўз мулкидан айрилган, аммо келишилган маблағни олмаган.
Шу сабабли у Тергов департаменти раҳбарияти ушбу мурожаатга эътибор қаратиб, холис текширув ўтказилишига кўмаклашишидан умидвор.
Эффецт.уз расмий муносабат кутади
Мазкур материалда келтирилган ҳолатлар аризачи томонидан билдирилган важлар ҳисобланади. Уларнинг қонунийлиги ва тасдиқланганлиги ваколатли органлар томонидан ўрганилиши лозим.
Эффецт.уз таҳририяти Ички ишлар вазирлиги Тергов департаменти ва мазкур ҳолатга алоқадор масъул идоралардан расмий муносабат кутади.
Мақола мурожаат ва унга илова қилинган ҳужжатлар асосида тайёрланди. Мақолада бирор шахснинг айби ҳақида қатъий хулоса қилинмайди.
Мулк эгаси адолат қарор топишига умид қилмоқда. Рамазон Ашрапов раҳбарлигидаги Тергов департаменти ушбу мурожаатга қандай муносабат билдириши жамоатчилик учун ҳам муҳим.
