Самарқанд вилоятида ноқонуний қум-шағал қазиб олиш ҳолати аниқланди. Ҳуқуқбузарлардан бири экологик назорат ходимларига қаршилик кўрсатиб, хизмат автомобилига зарар етказди.
Экология қўмитаси маълумотига кўра, Иштихон туманидаги «Кўтарма» маҳалласи ҳудудидан оқиб ўтувчи Оқдарё ўзанида экскаватор ёрдамида қум-шағал қазиб олинаётгани аниқланган.
Ҳуқуқбузарлик тўхтатилганида юк машинаси ҳайдовчиси қонуний талабларга бўйсунмай, қум-шағални тўкиб юборган ва экскаватор ҳайдовчисининг воқеа жойидан қочишига шароит яратган.
Шунингдек, у юк автомобили билан ходимлардан бирининг хизмат машинасига зарар етказган. Ҳолат юзасидан ҳужжатлар расмийлаштирилиб, табиатга етказилган зарар миқдори ҳисобланмоқда.
Тўпланган материаллар ҳуқуқий баҳо бериш ва тегишли чора кўриш учун ҳуқуқни муҳофаза қилувчи органларга юборилган.
