ИМарат Девелопмент атрофидаги можаролар ортидан Расул Кушербаевга ҳам саволлар кўпайди. У эса Марат Ҳамдамов билан аввалдан ҳамкорлик қилганини яширмаслигини, бироқ унга ишониб уй олган фуқароларнинг ҳуқуқлари таъминланиши учун қонуний йўл билан ёрдам беришга тайёрлигини билдирди.
Ижтимоий тармоқларда Расул Кушербаевга «Марат ва у билан боғлиқ можаролар бўйича нега индамайсиз?», «Сизни унинг ёнида кўрганмиз, ишониб пул тўлаганмиз», мазмунида эътирозлар билдирилган.
Кушербаевнинг айтишича, у вазиятга муносабат билдиришдан олдин қурилиш обектларидаги ҳақиқий ҳолатни шахсан кўриб чиқишни истаган.
У хусусан, «Сергели Цитй» лойиҳаси обектига борган ва у ерда қурилиш ишлари давом этаётганини кўрган.
Кушербаевнинг таъкидлашича, Марат Ҳамдамов ва унинг ҳамкори Жасур ўртасида келишмовчилик юзага келган. Бироқ унинг фикрича, бу низодан уй-жой учун пул тўлаган фуқаролар жабр кўрмаслиги керак.
Айни пайтда айрим обектларда қурилиш ишлари белгиланган муддатдан кечикаётганини ҳам қайд этди. Хусусан, «Сергели Цитй»да айрим ишлар бир ярим ойда тугалланиши айтилган бўлса-да, Кушербаев бу муддатга ишонч билан баҳо бериш қийинлигини билдирди. Унинг фикрича, ишлар яна бир неча ойга чўзилиши мумкин. Газ, электр ва сув билан боғлиқ масалалар ҳам ҳал қилиниши керак.
«Мен Маратнинг ёнида бўлганман»
Кушербаев ўзининг Марат Ҳамдамов билан муносабатларига оид саволларга очиқ жавоб берди.
У Маратнинг бир қатор тадбирлари ва ижтимоий лойиҳаларида иштирок этганини, улар ўртасида ҳамкорлик бўлганини тан олди.
Кушербаевнинг айтишича, Марат унинг муҳтож оилалар учун уй-жой қуриш, йўл ва бошқа ижтимоий лойиҳаларига қурилиш материаллари ҳамда молиявий жиҳатдан ёрдам берган.
«Мен ўша Маратнинг бир қатор тадбирларида, лойиҳаларида ёнида кўринганман, бундан ҳеч қачон тонмайман», — деди Кушербаев.
Унинг таъкидлашича, айрим фуқаролар айнан шу муносабатларни кўриб, унга ишонган бўлиши мумкин. Шу сабаб Кушербаев бугун уларнинг эътирозларини четлаб ўтмаслигини билдирди.
«Ўша ишонганман дегани учун мен туриб бераман. Ҳаққингизни ажратиб олишингизга қўлимдан келганча ёрдам беришга тайёрман», — деди Кушербаев.
Унинг айтишича, фуқаро хоҳласа уйини олиши, хоҳласа тўлаган маблағини қайтариб олиши учун қонуний йўл билан ёрдам беришга ҳаракат қилади.
«Мен уни ҳимоя қилмоқчи эмасман»
Кушербаев Марат Ҳамдамовни ҳимоя қилиш учун чиқмаганини ҳам алоҳида таъкидлади.
Унинг айтишича, Марат шахсан унга ваъда қилган ёрдамларини амалга оширган. Аммо бу унинг Марат билан боғлиқ бошқа ҳолатларга ҳам ижобий баҳо беришини англатмайди.
«Мен унинг ёнини олмоқчи ҳам эмасман. Балки бошқа муаммолари бор эди, мен уни билмадим», — деди Кушербаев.
Айни пайтда ИМарат Девелопмент атрофидаги вазият бўйича жиноят иши қўзғатилгани ва тергов ҳаракатлари олиб борилаётгани маълум қилинган. Ушбу иш доирасидаги ҳолатларга якуний ҳуқуқий баҳо тергов ва суд жараёнлари натижасида берилади.
Кушербаев эса бу жараёнда энг муҳими фуқароларнинг ҳуқуқлари таъминланиши эканини таъкидламоқда.
Унинг сўзларига кўра, одамларнинг уй-жойи ёки тўлаган маблағлари масаласи четда қолмаслиги керак.
«Одамларда айб йўқ. Сиз уй-жойингизни олишингиз керак ёки пулингизни қайтариб олишингиз керак. Мана шу ишда мен ёрдам беришга тайёрман», — деди у.
Шу билан бирга, Кушербаев қурилиш компаниялари билан ижтимоий лойиҳалар доирасидаги ҳамкорликни келгусида қайта кўриб чиқиши, ҳатто бундай амалиётни тўхтатиши мумкинлигини билдирди.
У ўзининг Марат билан аввалги ҳамкорлигидан афсусланмаслигини, бу ҳақда кечирим сўраш нияти ҳам йўқлигини айтди. Бироқ бугун унга ишониб, уй-жой учун маблағ тўлаган фуқаролар олдида четда турмаслигини таъкидлади.
«Бу видеони ўзимни оқлаш маъносида қабул қилманглар. Истаганча танқид қилишингиз мумкин. Мен вазиятни кузатиб боряпман. Муҳими, одамларда айб йўқ — сиз уй-жойингизни олишингиз ёки пулингизни қайтариб олишингиз керак», — деди Расул Кушербаев.
ЭФФЕЦТ.УЗ ушбу масалада ИМарат Девелопмент билан боғлиқ қурилиш обектлари, фуқароларнинг мурожаатлари ва тергов жараёнини кузатишда давом этади.
