«Сен мени алдаб, пулимни олдинг. Сен фирибгарсан, сен қароқчисан!» ИМАРАТ ДЕВЕЛОПМЕНТъдан уй олган Дилафруз Тўраева компания ва унинг раҳбарияти билан боғлиқ вазият юзасидан Марат Хайруллаевичга кескин мурожаат билан чиқди.
Тўраева видеомурожаатида компанияга ишониб маблағ тўлаганини, аммо бугунга келиб ўз пули ва уй-жой масаласида жиддий муаммога дуч келганини айтган.
У мурожаати давомида Марат Хайруллаевични кескин танқид қилиб, уни ўз маблағларини қайтариш масаласига ойдинлик киритишга чақирган.
«Мен ўзимнинг пулимни сўраяпман», — дейди Тўраева.
Мурожаатчининг айтишича, компания билан боғлиқ вазият унинг оиласига ҳам таъсир қилган. У уй-жой олиш умидида маблағ тўлагани сабаб оиласида ҳам тушунмовчиликлар юзага келганини билдирди.
«Қиёматда икки қўлим ёқангда бўлади, Марат! Менга нима туҳмат қилган бўлсанг... Мен қарғишдан қўрқадиган аёл эдим, лекин қарғайман. Аллоҳга солдим», — деди у мурожаатида.
Тўраева шунингдек, компания атрофида тарқатилаётган видеолар ва материалларга ҳам муносабат билдирган.
Унинг таъкидлашича, айрим материалларда сунъий интеллектдан фойдаланилиб, одамларнинг ҳис-туйғуларига таъсир ўтказишга уриниш бўлаётган бўлиши мумкин.
Мурожаатчи, айниқса, болаларнинг компания билан боғлиқ видеолар ва чиқишларда тилга олинишига кескин эътироз билдирган.
«Болаларда нима айб? Болаларни нимага аралаштириб, содда халқимизнинг раҳмдиллигини уйғотмоқчисан?»
Тўраева ўзини ҳақорат қилаётган ёки унга турли шахслар орқали босим ўтказилаётганини ҳам айтган. У исми-фамилияси ва телефон рақамлари очиқ эканини таъкидлаб, истаган одам билан юзма-юз гаплашишга тайёрлигини билдирди.
Мурожаатнинг яна бир эътиборли қисмида у компания билан боғлиқ вазият оилавий муносабатларга ҳам салбий таъсир қилганини айтди.
«Еримдан рухсациз бориб, пулларимизни топшириб келганимиз учун бизнинг оиламиз олдида тилимиз қисилди. Оиламизда тинчлик бузилди», — дейди Дилафруз Тўраева.
Унинг айтишича, одамлар компанияга ишониб, ўз маблағларини уй-жой олиш мақсадида топширган. Шу сабабли бугунги кунда асосий талаб — пуллар ва уй-жой масаласига аниқлик киритиш.
Дилафруз Тўраеванинг бу баёнотларидаги айбловлар унинг шахсий позицияси ҳисобланади. Унинг даъволари юзасидан ИМАРАТ ДЕВЕЛОПМЕНТ ва Марат Хайруллаевичнинг муносабати ҳозирча келтирилмаган. ЭФФЕЦТ.УЗ иккинчи томоннинг позициясини ҳам ёритишга тайёр.
