Ўзбекистонда иш берувчилар меҳнат жамоасида шаҳвоний шилқимликдан холи муҳитни таъминлаши шарт. Бу талаб Меҳнат кодексига киритилган янги ўзгартиришлар билан белгиланди.
13-ноябр куни Президент томонидан имзоланган қонунга кўра, шахснинг хоҳиш-иродасига зид равишда, унинг шаъни ва қадр-қимматини камситувчи шаҳвоний хусусиятдаги ҳаракатлар шилқимлик деб баҳоланади.
Бундай ҳаракатларга ходимнинг ташқи кўриниши ёки қоматини муҳокама қилиш, турли ишоралар қилиш, тегиниш ва шаҳвоний мазмундаги мурожаатлар киради.
Қонунчилик палатаси ҳужжатни 7-июл куни қабул қилган, Сенат эса 2-октябрда маъқуллаган. Қонун расмий эълон қилинган кундан эътиборан кучга кирган.
