Наманган вилояти Поп туманида собиқ хотинини ярашишга кўндирмоқчи бўлган эркак уни болалар боғчаси ётоқхонасида уч марта пичоқлаган. Оғир тан жароҳатлари олган аёл шифокорлар ёрдамида тирик қолган. Судланувчи 10 йилга озодликдан маҳрум этилди.
«Дарё» танишган суд ҳужжатларига кўра, воқеа 2026-йил 16-апрел куни тумандаги давлат мактабгача таълим ташкилотларидан бирида содир бўлган.
32 ёшли Б.А. ёрдамчи тарбиячи бўлиб ишлаётган собиқ хотини С.Б.нинг иш жойига келган. Улар 2023-йилда шаръий никоҳ асосида турмуш қуриб, бир нафар фарзандли бўлган. Бироқ оилавий келишмовчиликлар сабаб аёл ота-онасининг уйига кетган.
Эркак бир неча бор собиқ хотинига яна бирга яшашни таклиф қилган, аммо аёл рад жавобини берган.
Суд ҳужжатларида келтирилишича, воқеа куни эрталаб Б.А. собиқ хотинига қўнғироқ қилиб, учрашишни сўраган. Аёл ишда эканини, фарзандини кўрмоқчи бўлса, уни уйдан олиб кетиши мумкинлигини айтган.
Шундан сўнг эркак боғчага келган. Собиқ хотини уни кўриб, болалар ётоқхонаси томон қочишга уринган. Бироқ Б.А. унинг ортидан етиб бориб, билагини қайирган ва каравотга итарган. Яна бирга яшаш таклифи рад этилгач, ўзи билан олиб келган пичоқни аёлнинг қорнига уч марта санчган.
Жароҳатланган аёл кейинчалик собиқ эрига бирга яшашга розилигини билдирган. Эркак эса ташқарига чиқиб кетган. Ҳамкасблари тез ёрдам чақириб, С.Б. шифохонага олиб борилган. Шифокорлар унинг ҳаётини сақлаб қолишган.
Судда жабрланувчи соғлиғи яхшиланганини ва судланувчига нисбатан даъвоси йўқлигини билдирган. Боғча ходимларининг кўрсатмаларига кўра, ҳодиса вақтида болалар бошқа хонада машғулотда бўлган.
Б.А. судда пичоқни ўғлининг туғилган куни учун бозордан харид қилганини, дастлаб уни Россиядаги раҳбарига совға қилишни режалаштирганини айтган. Унинг кўрсатмасича, боғчада фарзандини кўриш масаласида собиқ хотини билан тортишиб қолган ва жаҳл устида пичоқ ишлатган.
Жиноят ишлари бўйича Поп тумани суди Б.А.ни Ўзбекистон Жиноят кодексининг 25 ва 97-моддаси 1-қисми — қасддан одам ўлдиришга суиқасд қилиш бўйича айбли деб топиб, 10 йил муддатга озодликдан маҳрум қилиш жазосини тайинлаган.
