Мактаб ошхоналарини «Е-ауксион» орқали ижарага бериш тартибига аниқлик киритилди. Давактив агентлигига кўра, ғолибни аниқлашда тадбиркорларнинг олдиндан тақдим этган ижара тўлови бўйича таклифлари асос қилинади.
Ижтимоий тармоқларда мактаб ошхоналарини электрон савдо орқали ижарага бериш ўқувчилар учун тайёрланадиган таомлар нархи ошишига олиб келиши мумкинлиги ҳақида хабарлар тарқалди.
Давлат активларини бошқариш агентлиги бу масалага муносабат билдириб, электрон механизмдан асосий мақсад мактабларда овқатланиш тизимини тижоратлаштириш эмас, балки ижара жараёнида очиқлик ва шаффофликни таъминлаш, тадбиркорлар учун тенг рақобат муҳитини яратиш ҳамда коррупсиявий хавфларни камайтириш эканини маълум қилди.
Янги тартиб Вазирлар Маҳкамасининг 2025-йил 11-январдаги 8-сон қарори билан жорий этилган.
Унга кўра, мактаб ошхонасини ижарага олиш истагидаги тадбиркорлар «Е-ауксион» платформаси орқали танловда иштирок этади. Улар олдиндан ўз таклифларини, жумладан, ижара тўлови миқдорини тақдим этади.
Ариза қабул қилиш муддати тугагач, иштирокчиларнинг таклифлари очилади ва энг юқори ижара тўловини таклиф қилган тадбиркор танлов ғолиби деб топилади.
Шунингдек, бу жараён классик ауксиондан фарқ қилади. Яъни, тадбиркорлар реал вақтда бир-бирининг нархини босқичма-босқич ошириб бормайди.
Яна бир муҳим жиҳат — ғолиб билан ижара шартномаси бир календар йилига эмас, бир ўқув йили муддатига тузилади.
Агентлик маълум қилишича, 2026-йил 13-октябрдаги 563-сон қарор билан мазкур тартибга яна қўшимча ва ўзгартиришлар киритилган.
Агентликнинг таъкидлашича, тизимдаги асосий устувор вазифа — ўқувчиларни сифатли, хавфсиз ва санитария-гигиена талабларига жавоб берадиган овқатланиш билан таъминлаш.
Демак, мактаб ошхонаси «Е-ауксион»га чиқарилганда ғолиб шунчаки энг кўп пул таклиф қилгани учун эмас, балки белгиланган танлов тартиби асосида аниқланади. Бунда ижара шартномаси ҳам бир ўқув йилига тузилади.
