Андижон вилояти Марҳамат туманидаги «Марҳамат агропилла» МЧЖ раҳбари ҳамда туман Камбағалликни қисқартириш ва бандликка кўмаклашиш бўлими бошлиғи ўринбосари 837 нафар фуқарони сохта равишда ишга жойлаштирган. Ҳолат юзасидан жамият раҳбари жиноий жазога тортилди.
Суд ҳукмида келтирилишича, «Марҳамат агропилла» МЧЖ раҳбари А.А. ва туман Камбағалликни қисқартириш ва бандликка кўмаклашиш бўлими бошлиғи ўринбосари Ш.Ж. ўзаро тил бириктириб, ижтимоий реестрда рўйхатда турган 837 нафар фуқаронинг шахсга доир маълумотларини ноқонуний равишда йиғган.
Шундан сўнг улар фуқароларни «Марҳамат агропилла» МЧЖга ишга қабул қилингани, 2025-йил май-октябр ойларида жамиятда ишлагани ва уларга 6,3 миллион сўм иш ҳақи ҳисоблангани ҳақида сохта маълумотлар киритган.
Натижада юзлаб фуқаролар иш билан таъминланганлик важи билан камбағаллик реестридан чиқарилган. Оқибатда реестрдаги 78 нафар фуқарога тўланиши лозим бўлган моддий ёрдам пуллари берилмай қолган.
А.А. судда ўз айбига иқрор бўлиб, қилмишидан пушаймонлигини билдирган ва енгиллик сўраган.
Жиноят ишлари бўйича Марҳамат туман суди ҳукми билан А.А. Жиноят кодексининг 141²-моддаси 2-қисми «а, г» бандлари, 28, 205-моддаси 2-қисми «а» банди ҳамда 28, 209-моддаси 1-қисми билан айбли деб топилган.
Унга иш ҳақининг 20 фоизини давлат даромадига ундириш шарти билан бир йил ахлоқ тузатиш ишлари жазоси тайинланган.
