Энергетика соҳасидаги йирик молиявий жиноят ҳақидаги иш судга юборилди. Мазкур ишда собиқ вазир Жўрабек Мирзамаҳмудов ва бошқа шахслар давлатга 498 миллиард сўмлик зарар етказишда айбланмоқда.
Маълум қилинишича, иш доирасида Жўрабек Мирзамаҳмудов ва бошқа шахслар давлат маблағларининг жами 498 миллиард сўмини талон-торож қилишда айбланмоқда. Эффецт.уз манбасига маълум бўлишича, жиноий иш доирасида Мирзамаҳмудовнинг акаси ҳам қамоққа олинган.
Бу ҳолат энергетика соҳасидаги бошқарув, давлат маблағларидан фойдаланиш ва улар устидан назорат тизими юзасидан жиддий саволларни келтириб чиқаради.
Айниқса, мамлакатда электр энергияси ва табиий газ таъминоти билан боғлиқ муаммолар сақланиб қолаётган бир пайтда, соҳадаги йирик молиявий қонунбузилишлар ҳақидаги хабарлар жамоатчилик эътиборини янада кучайтиради.
Давлат маблағларининг бундай миқдорда талон-торож қилингани ҳақидаги айбловлар энергетика тизимидаги муаммоларга қай даражада таъсир кўрсатган? Соҳадаги бошқарув ва назорат механизмлари ўз вазифасини бажарганми?
Албатта, бу саволларга суд жараёнида тақдим этиладиган далиллар ва суднинг қонуний, холис қарори ойдинлик киритади. Айбланувчиларнинг айби суднинг қонуний кучга кирган ҳукми билан тасдиқланмагунча, улар айбсиз ҳисобланади.
Маълумот ўрнида, Жўрабек Мирзамаҳмудов 2022-йил сентябридан бери вазирликка раҳбарлик қилиб келаётганди.
Жўрабек Мирзамаҳмудов 1979-йилда Наманган вилоятида туғилган. 2001-йил АҚШдаги Алабама университетини, 2005-йил Тошкент кимё-технологиялар институтини тамомлаган.
2006-2012-йилларда «Ўзбекнефтгаз»да турли лавозимларда ишлаган, 2012-2014-йилларда иқтисодиёт вазири ўринбосари, 2014-2017-йилларда «Ўзкимёсаноат» раиси ўринбосари бўлган, 2017-2018-йилларда Вазирлар Маҳкамасида департамент мудири лавозимида ишлаган, 2018-2019-йилларда Вазирлар Маҳкамаси ҳузуридаги Атом энергетикасини ривожлантириш агентлиги бош директори, 2019-йилдан «Ўзатом» агентлиги бош директори бўлган. 2019-2020-йилларда энергетика вазири ўринбосари лавозимида фаолият кўрсатган, 2020-йил январида «Ўзкимёсаноат» АЖ бошқаруви раиси лавозимига тайинланган.
Мирзамаҳмудов ишдан олингач, Президентнинг тегишли фармони билан Шерзод Хўжаев энергетика вазири этиб тайинланган.
